DILI: Militante Partidu CNRT hotu sei la’o tuir desizaun Prezidente Partido CNRT Kay Rala Xanana Gusmão hodi fó votus ba Kandidatu Prezidente Repúblika, Francisco Guterres Lu-Olo ba Períodu 2017-2017.
Tuir Xefe Bankada CNRT, Deputadu, Natalino do Santos dehan, sira sei vota ba Lu-Olo, tanba sira nia Prezidente Partidu, Xanana Gusmão deklara fó ona apoiu pesoál ba Lu-Olo.
Iha eleisaun Prezidensiál 2017, Xanana vota ba Kandidatu José Ramos Horta sai Prezidente 2007-2012, no iha 2012, Xanana lori CNRT vota ba Taur Matan Ruak sai Prezidente 2012-2017.
Tanba ne’e agora, CNRT hotu sei hamutuk ho Xanana vota ba Lu-Olo hodi hakat ba Palasiu Ai tarak-Laran.
“Ha’u fiar katak, Maun boot Xanana kuandu hamarek iha iha kandidatu ida nia sorin, ha’u fiar katak, dalan 99% nakloke ba Ai-Tarak laran ne’e” dehan Natalino ba jornalista, horisehik.
Natalino dehan, CNRT la haree ba interese grupu ka partidária, maibé haree ba interese komum no interese estadu tanba ne’e mak lideransa másimu Xanana haree katak ema ida atu asegura apropriada atu sai Presidente Repúblika ba povu Timor, Lu-Olo merese liu atu sai presidente.
Nia hatutan kuandu Lu-Olo eleitu sai Presidente, nia sei sai presidente ba ema hotu maske balun iha eleisaun la hili nia.
Tuir nia, Lu-Olo komprende estadu ne’e atu la’o oinsá tanba ne’e mak maun boot Xanana fó nia apoiu.
“Maun Xanana sempre fó orientasaun katak, tau interese estadu ne’e aas liu duke interese grupu ka interese partidu, maun boot nia desizaun ne’e sempre haree ba dok nia sempre hateten katak, labele haree ba loron ohin de’it, maibé tenke haree ba future,” hakturi Natalino.
Ho desizaun ne’e, lider CNRT sira sei tuur hamutuk hodi aviza ba militante hotu- hotu vota ba Lu-Olo manan iha primeiru ronda.
Diferensa Ideia, Objetivu Ida
Iha parte seluk, Deputadu FRETILIN, Aurélio Freitas dehan, durante ne’e CNRT no FRETILIN sempre halo diskusaun balu sai pro no kontra, maibé sira iha kometimentu ka objetivu ida de'it mak hakarak dezenvolvimentu rai ne’e la’o ba oin.
“Bele hakilar malu, maibé relasaun CNRT ho FRETILIN di’ak hela” dehan Aurélio.
Nia dehan, FRETILIN no CNRT durante ne’e halo kritika makas ba programa estadu nian balun, tanba hakarak hadi'a rai ne’e no lori povu sai husi kiak no mukit.
