Ministru Presidente Konsellu Ministru, Adriano Nascimento hatete, programa VII Governu nian daudaun ne’e pontu importante sira ne'ebé uluk deputadu opozisaun sira husu kuaze hadi'a hotu ona.

Tuir nia, governu mós agora hein hela Parlamentu Nasionál atu halo ajendamentu ba aprezentasaun programa governu ba daruak nian, maibé sei konsentra no fó prioridade ba Orsamentu Retifikativu (OR).

Kuandu diskusaun OR remata ona Prezidente Parlamentu Nasionál halo ajenda governu prontu ona atu halo justifikasaun programa ne'ebé deputadu sira husu.

“Kona-ba dadus sira ami halo hotu ona justifikasaun, hein atu halo validasaun kuandu diskusaun Orsamentu Retifikativu remata ona, ne’e signifika bele ona”, dehan Adriano, iha Hotel Timor, foin lalais ne’e.

Tuir nia, programa ne'ebé Governu halo hela elaborasaun mai husi komponente tolu ne'ebé fundamentál mak Planu Estratéjiku Dezenvolvimentu Nasionál (PEDN). Segundu, kontinuasaun obra ne'ebé VI Governu halo, maibé seidauk remata. Ikus liu mak, kumpre promesa sira ne'ebé durante kampaña partidu FRETLIN no Partidu Demokrátiku no partidu sira seluk hato’o ba eleitór sira.

Nia hatutan, sé de'it mak atu ukun mós sei halo dezenvolvimentu la sees husi hadi'a bee moos, estrada, eskola, saúde no agrikultura. Tanba ne’e, kuandu Governu lori ba mak AMP rejeita nafatin ne’e desizaun sira nian, polítika importante mak governu lori programa ba aprezenta.

FRETILIN ho PD nia hakarak mak atu responde povu nia nesesidade, maibé opozisaun la lakohi ida ne’e fila-fali ba povu mak bele julga.

Iha fatin hanesan, portavós Parlamentu Nasionál, Lídia Norberta Belo hatete, meza Parlamentu Nasionál mós simu ona informasaun husi Governu kona-ba aprezentasaun programa VII Governu ba daruak nian kona-ba nia ajendamentu.

Maibé, daudaun ne’e Parlamentu Nasionál sei konsentra hela ba rekursu sira ne'ebé AMP hatama. Tanba ne’e, ajendamentu sira ne'ebé ho karakter normál ne’e seidauk halo ajenda.

Meza Parlamentu Nasionál konsentra liu ba rekursu sira ne’e, tanba atu salva guarda dignidade órgaun ne’e nian atu ema labele dehan Prezidente Parlamentu Nasionál la imparsiál.