Primeiru Ministru, Mari Alkatiri defende katak, bainhira mosu eleisaun antesipada, Governu iha osan hodi realiza, kuandu Prezidente Repúblika foti desizaun tuir lei.

Ne’e duni, husu ba povu labele laran taridu bainhira eleisaun antesipada mosu, tanba osan iha hela.

“Ema balun husu, maka iha eleisaun antesipada karik osan iha para atu halo eleisaun antesipada? Ha'u bele hataan, “osan para atu gasta de'it ba eleisaun antesipada ne’e uitoan ita bele hetan, ne'ebé laiha problema””, dehan nia, iha Suai-Kovalima, Segunda (27/11).

Alkatiri dehan, Governu preparadu ona atu hasoru eleisaun antesipada no mós Governu prontu organiza bainhira desizaun Prezidente Repúblika atu hakat ba eventu ne’e.

“Aban bainrua maka Prezidente Repúblika deside ba eleisaun antesipda, governu preparadu atu organiza”, tenik nia.

Tuir Xefe Governu, povu agora matenek liu lideransa sira, komprende situasaun no pasiénsia no la buka kadeira. Povu hakarak nia vida atu la'o ba oin, maibé lider sira maka hadau kadeira rezulta povu tuur la hakmatek.

Maski nune’e, antes ne’e, Ministru Administrasaun Estatál (MAE), Valentim Ximenes hateten, too agora ninia ministériu seidauk koordena ho xefe governu atu diskute orsamentu ba eleisaun antesipada.

La’ós ne’e de’it, to’o ohin loron laiha koordena ho Sekretariadu Tékniku Administrasaun Eleitorál (STAE) no Comisaun Nasionál Eliseons (CNE).

Ministru Valentim dehan, iha nivel polítika seidauk rona desizaun ruma mai husi Prezidente Repúblika atu deside eleisaun antesipada ka lae.

“Ha’u lakohi antesipa buat ida ke ha’u rasik la hatene buat ida… Tanba ida ne’e depende ba desizaun Estadu”, dehan nia, iha Suai-Kovalima, Sábadu (25/11).

Entretantu, antes ne’e, jurista timoroan, Manuel Tilman, dehan atu lori nasaun ne’e sai husi krize polítika, Prezidente Repúblika, laiha ona dalan seluk tenke deside eleisaun antesipada.

“Ha’u apoiu atu iha eleisaun antesipada, maibé ne’e desizaun ba Prezidente Repúblika atu deside eleisaun antesipada ka ou fó ba AMP forma VIII Governu,” tenik nia.

Entretantu, Primeiru Ministru, Mari Alkatiri, liu husi nia rede sosiál deklara ona prontu atu hakat ba eleisaun antesipada.

Nune’e, Prezidente Partidu CNRT, Xanana Gusmão, Prezidente PLP, Taur Matan Ruak no Konselleiru Superiór KHUNTO, José dos Santos ‘Naimori’ deklara prontu atu simu desizaun aas husi Prezidente Repúblika.

Xanana dehan, AMP prontu atu simu responsabilidade, no AMP mós sei la ezije ba prezidente atu viola konstituisaun.

Xanana apela ba povu tomak atu labele laran taridu ba desizaun saida de’it maka Xefe Estadu foti. Tanba iha difikuldade hanesan ne’e maka ema hotu tau hanoin hodi bele hadi'a.