Nia dehan, sistema pagamentu bainhira ezekuta loos ona konserteza sistema iha banku mós simu ona. Nune’e osan mós transfere kedas, maibé nia rasik konfuzu tanba saida to’o oras ne’e saláriu no vensimentu sempre tama tarde.

“Ha'u seidauk komprende problema ne’e iha ne’ebé, maibé loron rua liu ba aprovasaun hotu ona”, dehan Rui, iha knaar fatin, Ai-Tarak Laran-Dili, horisehik.

Tuir nia, bainhira hetan aprovasaun sistema pagamentu sei halo transferénsia automatikamente ba funsionáriu sira ida-idak nia-banku.

Ne’e duni, ministru Rui husu ba banku sira atu klarifikasaun no fallansu saida mak halo funsionáriu balun simu saláriu tarde. Tanba, parte Ministériu Planu Finansas nian ezekuta ona antes.

Maibé, sistema foun ne’ebé VII Governu utiliza kontinua funsiona ho di'ak hodi atende sistema finanseiru nian ba ezekusaun orsamentu iha ministériu Planu no Finansas rasik.

Nia dehan, laiha problema ho sistema pagamentu ba funsionáriu sira tanba karik iha fallansu tékniku loron ida ka rua, maibé Governu espera katak atu buka dalan atu aselera lalais pagamentu ne’e.