Primeiru Ministru (PM), Mari Alkatiri hateten, nu'udar xefe Governu nia maka iha kompeténsia tomak atu foti desizaun ba membru Governu sira ne’e, tanba nia maka hili sira.

Relasiona ho deklarasaun Ministru Defeza Seguransa, José Agostinho Sequeira ‘Somotxo’, nia dehan, ne’e hatudu hanesan umana la sees husi sala, tanba dala ruma la kontrola emosaun.

“Ha'u sei la-autoriza nein membru Governu ida atu rezigna-aan. Hau maka hatama sira, ha'u maka asume responsabilidade ba sira”, dehan PM Alkatiri, hafoin partisipa selebrasaun Restaurasaun Independénsia, iha Suai-Kovalima, horisehik.

Xefe Governu ne’e subliña, se ema ruma la gosta, nia (Somotxo) hakarak arrepende karik auto kritika husu deskulpa, maibé laiha ema ida atu rezigna-aan.

“Saida maka ko'alia, as vezes emosaun, sala ne’e normál ho emosaun, I laiha konsekuénsia aat ba rai ida ne’e”, tenik nia.

Entretantu, Xefe Bankada PLP, Fidelis Magalhães halo deklarasaun katak, kona-ba rezignasaun ministru Defeza Seguransa ne’e la'ós kompeténsia lider bloku Aliansa Maioria Parlamentár nian.

Maibé, kompeténsia ministru Defeza Seguransa hó Xefe Governu nian atu bele hataan.

AMP Husu Somotxo Demite

Antes ne’e, bloku opozisaun Aliansa Maioria Parlamentar (AMP) kontra deklarasaun Ministru Defeza no Seguransa (MDS), tanba ne’e husu ba Presidente Repúblika atu foti medida hodi demite husi nia-kargu.

Antes ne’e, ministru Defeza no Seguransa hatete, polisia no forsa armada nia-osan besik ezekuta hotu ona, tanba ne’e presiza osan hodi operasionaliza funsionamentu instituisaun rua ne’e.

Tanba ne’e, Ministériu Defeza no Seguransa presiza atu Parlamentu Nasionál diskute no aprova lalais Orsamentu Retifikativu hodi suporta instituisaun rua ne’e iha tempu emerjénsia ruma.

“Kuandu problema ruma mosu iha Timor ne’e, nem soldadu ida sai, nem polisia ida sai. Hotu-hotu iha kuartél. Ne'ebé, entrega tomak ba deputadu na’in 35 atu rezolve problema Timor laran tomak”, dehan Ministru Somotxo.

Haree ba deklarasaun ne’e, Prezidente Bankada Partidu Libertasaun Populár (PLP), Fidelis Magalhães hatete, deklarasaun MDS nian ne’e prefere ba deputadu AMP atu toma responsabiliza ba kestaun seguransa bainhira mosu problema ruma.

Konstituisaun fahe ona podér atu kada órgaun soberania ida-idak bele hala’o knaar. Tanba ne’e, deputadu iha Parlamentu Nasionál la'ós atu garante estabilidade seguransa, ne’e entrega tomak ona ba instituisaun rua atu bele tau matan.

Nune’e, Prezidente Bankada KHUNTO, Luis Roberto hatete, hanesan lideransa ida ne'ebé asume knaar hanesan ministru Defeza no Seguransa, atu hasai liafuan tenke hanoin didi’ak lae sei kria polémika no hamosu konflitu iha Timor.

Tanba ne’e, nia husu MDS atu halo buat ruma tenke bazeia ba Konstituisaun no lei orgánika instituisaun rua ne’e nian. Nune’e labele hali'is ba grupu ka partidu ida, maibé tenke neutru hodi sai ministru ba povu tomak.

Entretantu, Prezidente Bankada CNRT, Arão Noe de Jesus hatete, polisia no forsa ne’e hanesan instituisaun autónoma, MDS sai hanesan órgaun ne'ebé atu funsiona administrasaun no halo polítika. Tanba ne’e, instituisaun rua ne’e sei la simu orden husi ministru.

Hataan ba kestaun ne’e, Ministru Defeza no Seguransa (MDS), José Agostinho Sequeira ‘Somotxo’, responde ona preokupasaun bloku Aliansa Maioria Parlamentár (AMP), hafoin ministru hasai deklarasaun hodi entrega atualizasaun seguransa ba deputadu na’in 35 husi bloku AMP.

“Depois komemorasaun loron 28 Novembru remata ha’u sei lori termu pose ne’ebé simu ona husi Prezidente Repúblika, atu demite-aan husi ministru Defeza no Seguransa,” dehan Ministru Somotxo, iha Munisípiu Kovalima, Sábadu (25/11).

Nia hatete, kargu ministru ne’e sei entrega ba deputadu opozisaun sira, tanba sira mak dehan Ministru Defeza ida agora daudauk ne’e laiha kapasidade no kontra Konstituisaun.

Nia dehan, ema ne’ebé atu demite nia mak Primeiru Ministru, bainhira Xefe Governu la demite nia, entaun Prezidente Repúblika mós labele.

“Kuandu ha’u demite ha’u nia-aan, konserteza iha deputadu balun mak sei mai troka ha’u nia fatin,” tenik nia.

Maibé Somotxo sei hasoru malu ho deputadu sira no peritu hirak ne’ebé hasai ona kursu militár F-FDTL no PNTL nian atu diskute ho sira, kona-ba saida mak deputadu sira ko’alia ona.

Nia hatutan, liafuan ne’ebé nia ko'alia kona-ba atu hadi'a kondisaun F-FDTL no PNTL la’ós krime, tanba ne’e ezije ba deputadu sira atu aprova Orsamentu Retifikativu.