Tuir portavós AMP, Taur Matan Ruak, realizasaun solene hasae bandeira tolu iha sede ida hanesan istória ida ne'ebé partidu tolu ne’e halo iha prosesu demokrasia ne'e.

Nia hatutan, liu husi atividade ne'e hatudu katak agora ne'e AMP sólidu ka forte tebes iha lasu unidade iha solidariedade, no iha vontade no mós empeñu hanesan maun-alin iha prosesu polítiku.

Liu husi ne'e atu promove dezenvolvimentu no bem estar povu nian no iha prontidaun atu hasoru kualkér dezafiu polítiku ne'ebé husi planu governu ka mai husi planu eleitorál.

Nia hatutan, atu solusiona situasaun polítika iha rai laran kompeténsia hotu-hotu iha ona Prezidente Repúblika nia liman. Tanba ne'e, desizaun saida de'it mak atu mosu bloku AMP prontu atu koopera.

"Ami sei la tau buat ruma ba Prezidente Repúblika nia ibun atu halo desizaun. Husik nia mak halo desizaun tuir Konstituisaun", tenik Taur, iha sede CNRT, Sesta (15/12).

Nia hatutan, AMP rasik seidauk no nunka hanoin atu ba eleisaun antesipada, tanba ne’e sei iha dalan Konstituisaun atu Xefe Estadu deside tanba iha istória Timor seidauk hakerek eleisaun antesipada.

AMP daudaun ne’e sai ona alternativa ba VII Governu nian, bainhira Prezidente Repúblika fó konfiansa prontu serve hodi hodi viabiliza no garante governu dura too tinan lima.

Tanba, AMP garantia forsa polítika iha PN ho 35 kadeira bele asegura Governu too mandatu remata.

Iha fatin hanesan, Konselleiru KHUNTO, José dos Santos 'Naimori' hatete, partidu tolu hanesan CNRT, PLP no KHUNTO ba oin sai ida de'it. Tanba ne’e, militante no kuadru partidu tolu iha baze fó liman ba malu hodi servisu hamutuk.

Tanba ne'e, husu ba militante no simpatizante sira iha baze atu kontinua tau fiar ba lideransa másimu sira atu buka solusaun ba situasaun polítika ne'e.

Husu mós ba timoroan tomak atu hakmatek hala'o ida-idak nia servisu kontinua hametin unidade, hodi haforsa unidade nasionál.

Iha fatin hanesan, Forum Demokrátiku Nasionál (FDN), Hermenegildo Lopes ‘Kupa’ hatete, FDN kompostu husi partidu 12 ne'ebé la hetan asentu iha PN fó apoiu ba AMP tanba hakarak atu salva Konstituisaun.

“Iha nasaun ne’e ema individu ka grupu tenke hakru'uk ba konstituisaun tanba iha nasaun ida konstituisaun mak boot liu" dehan nia, iha sede CNRT.

Nia hatutan, tempu to’o ona atu hamutuk ho lider rezisténsia iha frente armada atu salva K-RDTL hodi lori nasaun ne'e ba dalan dezenvolvimentu.

Sira mós husu ba Prezidente Repúblika atu kontinua uza nia kapasidade hodi foti desizaun tuir kompeténsia Konstitusionál hodi foti desizaun ne'ebé di'ak liu ba futuru nasaun no povu nian.