Parlamentu Nasionál altera ona lei pensaun mensal Vitalisia ba eis titulares sira hamutuk 60%.

Komunidade Suku Atu-Aben, Postu Administrativu Bobonaro Munisipiu Bobonaro Jose Marçal da Cruz konsidera alterasaun Lei Pensaun Vitalisia (LPV) ne’ebé aprova iha PN nudar projétu deputadu sira nian atu ukun na’in sira fahe osan ba malu maske ukun tinan lima de’it.

Iha fatin hanesan,  Afonso Soares hatete, Parlamentu Nasionál redus ba 60% tanba tauk atu lakon simu pensaun bainhira ukun hotu iha tinan lima.

“Deputadu sira lakoi hamoos tanba sira hakarak ukun tinan lima hotu tuur deit simu osan estadu,”tenik nia.

Komunidade suku Ilatlaun Manuel Pires Amaral husu halakon pensaun Vitalisia tanba estudante barak sei tuur iha rai no menus fasilidade eskola nian.

Komunidade husu ba Prezidente Republika atu veta tan bainhira     Tribunál Rekursu haruka fila tanba povu barak sei infrenta problema bee moos, estrada, edukasuan no balun lahetan hahan.

Tanba, Osamentu pensaun Vitalisia ba eis titulares hanesan membru Governu, membru PN, Prezidente Republika (PR) no Prezidente Tribunal Rekursu (PTR) sei aumenta kada tinan lima.

Taur Hakarak Hamoos

Prezidente Republika (PR) Taur Matan Ruak hateten nia hakarak Parlamentu Nasionál hamoos pensaun vitalisiaba eis titulares sira.

Xefe Estadu dehan nia parte sei luta hodi halakon  Pensaun Vitalisia tanba povu barak mak sei moris kiak no mukit.

“Ha’u kontra pensaun vitalisia ne’ebé haruka ona ba tribunal no hau sei haruka ba Parlamentu maske ita maju kena- mundur kena maibe ita sei luta nafatin atu halakon tanba iha dalan ba ita atu luta hodi halakon,” promete Xefe Estadu.

PR Taur dehan,pensaun vitalisia iha mundu tomak iha, maibé iha timor tenke hamoos tanba ema kiak sei barak.