Prezidente timoroan ne’e hateten, soru-mutu ne’e tanba Ramos Horta nu’udar maun boot atu fó ninia opiniaun hodi kontribui ba pás no estabilidade ba Governu foun ne'ebé sei mai.
“Ami na'in rua hasoru malu hodi ko'alia uitoan kona-ba situasaun polítika iha ita nia rai laran, liuliu depois eleisaun parlamentár ho rezultadu votu ne'ebé partidu polítiku sira hetan”, dehan Lú-Olo’, iha Palasiu Prezidensiál Ai-Tarak Laran, Sesta (28/7).
Tuir nia, premiadu Nobel da Pás ne’e hanesan maun boot bele fó opiniaun no hanoin ruma atu oinsá mak bele hateke ba oin hodi bele garante pás ho estabilidade nafatin ba iha futuru Governu ne'ebé sei mai.
Iha fatin hanesan, eis-Xefe Estadu, José Ramos Horta hateten, Prezidente Repúblika konvida nia ne’e atu sira troka opiniaun kona-ba prosesu formasaun Governu foun ba oin nian.
Horta hateten, ema hotu hatene ona rezultadu. Tanba ne’e, Tribunál Rekursu (TR) tuir nia mandatu atu halo nia opiniaun definitivu ba rezultadu ne’e.
Tanba tuir, konstituisaun RDTL mós bainhira Tribunál Rekursu anunsia ona rezultadu finál, hafoin Xefe Estadu konvida fila-fali partidu polítiku ne'ebé hetan asentu iha Parlamentu Nasionál, inklui lider sira bele rona nia.
“Ha'u nia opiniaun rasik la’o segredu hotu-hotu hatene, maun boot Mari Alkatiri ho maun boot Xanana Gusmão, sira na'in reprezenta jerasaun rezisténsia iha partidu lima ne'ebé manan, jerasaun rezisténsia no jerasaun 1975 tenke tuur hamutuk kolabora haree Governasaun saida mak di'ak liu 2017-202”, dehan Horta.
Nia hatutan, sira na'in rua iha todan boot ida iha sira nia kabas, iha sira nia konxiénsia sira na’in rua hatudu ona iha tinan tolu mai ne’e servisu di'ak tebes Timor hetan dame no dezenvolvimentu tanba sira na'in rua kolabora.
Eis Primeiru Ministru ne’e ne’e argumenta, bainhira laiha kolaborasaun entre FRETILIN no CNRT mak povu sei la moris iha hakmatek nia laran.
Tanba ne’e, husu ba lider rezisténsia Mari Alkatiri no Xanana Gusmão tenke tuur hamutuk atu bele haree solusaun di'ak liu ba Governu foun oin mai.
“Ha'u konfiansa maun boot Xanana Gusmão tinan 10 nia laran halo buat barak, infraestrutura oioin, Timor oan barak kuadru boot haruka estuda ida ne’e no haruka ba li'ur atus ba atus. Dala ruma ita hare de'it infraestrutura, maibé keta haluha kuadru estrutura maun boot haruka,”tenik Horta.
Horta husu atu governasaun foun mai tenke kontinua programa ne'ebé hahú ona, tanba programa ne’e halo parte iha prosesu prepara jerasaun iha 2022 tenke simu.
Nia dehan, sira nu’udar lider rezisténsia tenke simu responsabilidade, ne’e mak primeiru hametin no hakle'an dame, hadi’a di'ak liu tan instituisaun demokrátiku ka instituisaun Estadu signifika hadi’a podér judisiál.
Nune’e mós hadi’a funsionamentu Parlamentu Nasionál (PN), hatún korrupsaun no presiza tenke hatún gastu oioin, tenke taka despeza ne'ebé la presiza halo, maibé atu halo ida ne’e lider sira mak tenke servisu hamutuk.
