Prezidente Partidu CNRT, Xanana Gusmão dehan iha futuru oin, CNRT mak kaer governu foun sei dezenvolve halo di’ak foho matebian ba fatin turizmu.
Tanba, Xanana hatete, foho matebian área potensiál ba fatin turizmu ne’ebé intelektuál munisípiu Baukau tenke tuur hamutuk halo planu dezenvolve foho matebian ba fatin turizmu hodi fornese reseita.
Eis Primeiru Ministru ne’e, husu ba intelektuál munisípiu Baukau labele hein de’it ema seluk mak atu dezenvolve fali Munisípiu Baukau.
“Foho Matebian fatin ida Turizmu mak ita halo di’ak ema sempre ba mai, mai sira sei mai hela iha Baukau”,dehan Xanana iha komísiu Polítika kampaña iha Aeroportu Munisípiu Baukau, Sábadu (08/07).
Polítika CNRT, nia dehan, sei hamutuk ho Juventude no intelektuál Munisípiu Baukau atu hakbesik aan ba povu sira hodi ko'alia kona ba dezenvolvimentu iha Munisípiu Baukau.
“Ha’u sei mai atu husu Baukau oan sira koñese nia rain ka lae, depois ba estuda iha Dili, ha’u sei fila fali ba fatin turizmu ne’e bele dezenvolve, tenke imi Baukau ona mak dezenvolve área potensiál sira ne’e”, dehan Xanana.
Baukau oan tenke hanoin ona hodi produs produtu Timor Leste nian atu nune’e bele dudu ekonomia la’o ba oin hodi labele dependénsia ba sasan importasaun.
“Agora ita sosa buat hot-hotu iha li'ur atu ne’ebé ita tenke dudu ekonomia, ita iha aifuan barak hakarak halo agro indústria, hakarak halo jus tenke kuda ai fuan barak para labele sosa de’it husi liur mai”, enkoraja Xanana.
Munisípiu Baukau área potensiál boot tebes hanesan fatin fabrika semente, bee moos no potensiál ba fatin Turizmu.
“Manu tolun de'it ita sosa husi liur ita lahatene hakiak manu lahatene ka ita nia manu mak la fó tolun, ita tenke esforsu aan sei la’e martelu tau iha imi nia ulun”, dehan Xanana
