Nia dehan, prosesu apuramentu nasionál husi Comissão Nacional Eleições (CNE) foin remata, tanba ne’e sei lori ba Tribunál Rekursu (TR) hodi fó sai rezultadu finál.

“Hein tribunál ninia desizaun ikus anúnsiu kona-ba rezultadu. Hafoin ida ne’e hotu mak ami sei haree hamutuk”, dehan Xefe Estadu, iha Palasiu Prezidensiál, Ai-Tarak Laran, Sesta (28/7).

Husu kona-ba perspetiva Prezidente Repúblika nian kona-ba formasaun Governu foun, nia dehan, importante mak governu foun mak tenke governu ne’ebé bele garante maioria parlamentár hodi bele dura to’o ninia mandatu remata.

“Ha'u nia opiniaun, Governu ida ba futuru, Governu ida estavel, Governu ida dura to’o tinan lima para atu bele responde ba nesesidade povu nian,”deklara ‘Lú-Olo’.

Nia hatutan, mensajen povu nian liu husi votu ne'ebé sira fó ba partidu polítiku sira husu atu serbisu hamutuk, liuliu lider istóriku sira tenke serbisu hamutuk hodi hadi’a povu nia moris durante tinan lima.

Tanba ne’e, husu ba Governu foun ne'ebé sei mai tenke estavel hodi dura to’o tinan lima, nune’e bele responde nesesidade povu nian nu'udar resposta ba mensajen povu nian liu husi votu ne'ebé sira fó.