Prezidente Tribunál Rekursu, Deolindo dos Santos hatete, depois apuramentu nasionál iha CNE, Tribunál Rekursu atu fó tempu ba parte sira iha prazu oras 48 atu hatama rekursu antes desizaun ikus. Nune’e, Tribunál hahú husi Domingu no Segunda halo verifikasaun ba dokumentu sira ne’e hotu.
Koletivu juis haree ba prosesu ne’e verifika katak, laiha irregularidade ruma buat ne’ebé sala hodi afeta rezultadu eleisaun Parlamentár nian.
Ne’e duni, Tribunál Rekursu (TR) iha desizaun finál notifika ona ba partidu Frente Revolusionáriu Timor Leste Independente (FRETILIN) nu’udar partidu mais votadu iha eleisaun lejizlativa períodu 2017-2022 ho totál votu 168.480 ka (29,7%).
Partidu segundu mais votadu mak CNRT ho totál votu 167.345 ka (29,5%), nune’e Partidu Libertasaun Populár (PLP) 60.098 (10,6%), Partidu Demokrátiku (PD) 55.608 (9,8%), partidu KHUNTO 36.547 (6,4%).
Desizaun Tribunál Rekursu ne’e rasik laiha mudansa ho apuramentu nasionál ne’ebé halo husi Comissão Nacional Eleições (CNE).
Juis koletivu Tribunál Rekursu nian julga no fó validasaun ho proklamasaun rezultadu ba eleisaun parlamentár nian iha tinan 2017 nian, ho rezultadu definitivu mak eleitór inskritu hamutuk 760,907, votante 583.956, votu válidu 568.070 korresponde ba (97,28%), votu mutin 4.097, votu nulu 11.711 ka (2,01%).
Ne’e duni, lista ne’ebé konkorrente partidu polítiku sira ultrapasa husi 4% ne’e, partidu FRETILIN hetan kadeira deputadu 23, partidu CNRT kadeira 22, PLP kadeira 8, PD kadeira 7 no partidu KHUNTO kadeira deputadu 5.
