Prezidente Partidu Republikanu João Saldanha hatete, PR prontu ko'alia ho Banku Nasionál Komersiál Timor Leste (BNCTL) atu loke kréditu ba kompañia mikro ki’ik no meiu iha nasaun ho funan 4% to’o 7%.

“Ami sei ko'alia ho seitor privadu ho banku seitor monitariu atu implementa programa moris di'ak. ita rona partidu sira seluk koalia kona ba kréditu moris di'ak maibé sei bagu hela”,dehan nia liu husi imprensa iha sede PR-Vila Verde, Kuarta (21/06/).

Kaer ukun, nia dehan, sei aloja orsamentu tokon 100 ba BNCTL atu fó kréditu ba povu ki’ik no kompañia lokál sira ho funan ki’ik.

Kritériu fó kréditu, Lider PR ne’e afirma, povu ki’ik sira halo negósiu ho funan $50  ba leten  ne’e bele fó ona prioridade atu loke sira nia negósiu ho funan ki’ik hahú husi 4% to’o 7% kada tinan.

PR sei fó prioridade ba Saúde no Edukasaun hodi hadi'a jestaun tanba durante ne’e fallansu barak mosu

Setór Saúde liuliu iha ONGV ne’e, nia dehan, durante ne’e ONGV hanesan fatin ba semitériu ema moras tanba mate aumenta barak liu.

Tanba ne’e, nia lamenta Primeiru Ministru Rui Maria de Araújo no Ministru Saúde kria komisaun atu halo investigasaun ba Doutór Nilton Tilman ne’ebé hakerek fallansu ONGV iha Facebook.

 “loloos Governu rezolve no hadi'a jestaun ONGV la'ós forma tim tun sa'e ba investiga Doutór Nilton Tilman”, dehan nia.

Iha problema seluk mós hanesan,ema ko'us mate lori tula iha motor la tau iha kaixaun buat sira akontese iha Dili laran no iha HNGV tanba ne’e Prezensa partidu PR nian iha futuru sei hadi'a no povu nia moris.

Setór edukasaun nia dehan, infraestrutura eskola barak seidauk konsege hadi’a no programa merenda eskolár seidauk la'o másimu ne’e tenke hadi'a.