Deputadu CNRT, Gabriel Soares kestiona mós desizaun governu nian ne’ebé oferese de’it subsidiu ba loron 27 ba mediku sira, afinal sira-nia serbisu atende Covid-19 durante loron 60 nia laran.

“Depois pesoal saúde sira iha terenu halo protenstu aumentu loron sanolu (10) ba loron 37, saida mak ida ne’e, estadu emerjénsia ita hatene momoos aprova iha ne’e (PN) 60 dias,” dehan nia iha Parlamentu Nasionál, Segunda (22/06).

Tuir deputadu ne’e, durante pesoal saúde sira serbisu iha front line, sira hasoru situasaun grave.

Nia lembra katak, iha diskusaun ba Covid-19 nian, deputadu balun sujere atu fó $40 ba pesoal sira ne’ebé serbisu iha liña oin, maibé realidade governu implementa oin seluk.

“Realidade sira ne’ebé dasa rai $5, pesoal saude ne’ebé fó tratamentu $15, profisional saude $25, depois Parlamentu Nasionál aprova osan boot, governu tau hotu ona iha ne’ebé?,” deputadu ne’e kestiona.

Deputadu ne’e husu atu governu labele lori trabaladór sira-nia naran hodi mai husu osan iha PN, depois ba to’o iha ne’eba governu jere tuir nia gostu de’it.

“Estadu emerjésia 60 dias, tanba sa mak halo pagamentu subsidiu 27 dias?, (depois) sira halo protestu mak hasa’e ba 37 dias.”

“(Osan) restu 60 dias ne’e ba tau iha ne’ebé?, osan ne’e koa ba tau iha ne’ebé?, osan aprova ne’e valoriza sira-nia serbisu, mosu relatoriu iha pajina 9 katak dezvalorizasaun no diskriminasaun, ita labele diskrimina ema kbiit laek sira, ema ne’ebé laiha lian. Tanba ita iha poder ita halo konferme ita-nia hakarak,” dehan nia.

Hatan ba kestaun ne’e, Vise Ministra Finansas, Sara Lobo Brites hatete, valor subsidiu ba pesoal saúde ne’e Konsellu Ministru mak deside.

Tuir nia, valor subsidiu ne’e tanba tetu mós ba limitasaun fundu no gravidade husi kazu Covid-19 iha Timor-Leste.

Maske nune’e, Vise ministra ne’e dehan, nia sei hato’o ba konsellu ministru kona-ba preokupasaun deputadu hafoin bele deside fila-fali valor ne’ebé atribui.

Kona-ba durasaun EE, Vise Ministra ne’e hatete, estadu emerjénsia implementa iha fulan tolu, maibé governu atribui subsidiu ba de’it fulan rua.