Tuir deklarasaun governu, programa sesta bazika ne’e ho intensaun la’os de’it apoiu nesesidade baziku ba sidadaun Timor-Leste, maibé mós ajuda sosa produtu ne’ebé agrikultura sira produs.

“Mai ha’u sesta bázika hanesan mós asaun karitaviva ne’ebé entidades barak halo tiha ona, se ita hakarak halo fahe sasan sira hanesan pudia ita halo antes par tama iha estadu emerjénsia par ajuda populasaun. Maibé se governu mai ho rekuperasaun ekonomika depois ba fahe sasan hanesan asaun karitativa ne’e laiha sustentabilidade,”dehan Deputada CNRT, Veneranda Lemos liu husi diskusaun ba planu rekuperasaun ekonómika, iha Parlamentu Nasioál, Tersa (20/10).

Deputada ne’e mós husu governu identifika ona produtu saida mak sei fahe iha programa sesta bázika.

“Governu identifika ona ka la’e, kada familia ninia nesesidade la hanesan, tanba governu labele fó koto no batar ba familia hotu-hotu, tanba iha uma laran, oan mós kaan han buat seluk ida, aman mós kaan seluk no inan mós kaan han buat seluk ida, tanba ne’e goveru presiza ba indetifika par hatene.”

“Ha’u la fiar tanba ha’u hanesan agrikultór produs hela koto, ita-boot sira ba sosa tiha ha’u-nia sasan depois hola tiha ha’u koto izmola mai ha’u sesta bázika ne’e, asaun karitativa ita sira atu halo só ké diferensia mak uza fali osan estadu,” nia dehan.

Deputada ne’e mós preokupa kona-ba montante osan ne’ebé gasta ba programa ne’e. Tanba tuir nia, programa sesta bazika ne’e sei gasta orsamentu liu millaun $65. Enkuantu osan ne’ebé governu aloka ba programa ne’e mak millaun $71.5.

“Ha’u nafatin preokupa mekanizmu ba implementasaun sesta bázika, tanba se $25 kada pesoa vezes 1 milaun populasaun vezes 2 meses  hamutuk milaun $65 mak sei gasta.”

“La sala Ministru  dehan   katak  ida sei  tau sasan tau iha bote hodi fó diretamente, maibé ba mekamizmu ida ne’e presiza kustu operasionais,   hanesan presiza karreta ba tula sasan no presiza tau osan ba per diem, ida ne’e sei kria nafatin problema anterior,” dehan nia.

Tan ne’e, tuir nia, programa sesta bazika ne’e la oportunu, maibé oportunu liu mak fó apoiu ba empreza sira atu oinsá sira iha kbiit fila-fali.

Iha fatin hanesan, Prezidente Bankada Fretilin, Francisco Miranda Branco hatete, sesta bázika sei mai duni benefisia ba produtor agrikultor sira ne’ebé produs divertus produtus bazikus alimentares.

“Mais mós benefisia setores sira ne’ebé komersiais. Nu-fin Sesta bázika sei benefisia ba sidadaun hotu-hotu iha rai ida ne’e,” dehan nia.