Ministru Prezidensia Konsellu Ministru Fidelis Leite Magalhaes deklara katak politika kampu serbisu rihun 60 kada tinan ne’e nu’udar programa governu Aliansa Mudansa ba Progresu (AMP).
Ministru Fidelis hato’o kestaun ne’e tanba Deputada Bankada CNRT, Veneranda Lemos ezije progresu programa kriasaun kampu serbisu rihun 60.
“Señor Ministru Fidelis nia deklarasaun iha tempu liu ba sei loke kampu traballu 60 mill ba timor-oan sira, to’o oras ne’e ema hira mak servisu?,” dehan Veneranda liu husi diskusaun planu rekuperasaun ekonómika, iha Parlamentu Nasioál, Tersa (20/10).
Hatan ba deklarasaun ne’e, Fidelis dehan, laos nia mak sai nu’udar na’in ba promesa kampu serbisu rihun 60.
“Ha’u halo defeza onra ida relasiona ho intervensaun balun ohin husi deputada bankada CNRT nian, relasiona ho 60 mill kampu traballu ne’e la’ós na’in mak ha’u, Fidelis Magalhães, na’in mak Aliansa Mudansa ba Progresu (AMP) ne’ebé implika na’in mak CNRT,” dehan Ministru Fidelis.
Iha governu AMP, nia dehan, nia sai nu’udar Ministru Reforma Lejizlativa Asuntu Parlamentár iha devér atu fó sai programa governu nian.
Nia argumenta, programa kriasaun kampu traballu ne’e asina husi lideransa másimu AMP nian kompostu husi Xanana Gusmão, Taur Matan Ruak no José “Naimori” Bucar.
“Ha’u tenke ko’alia sai buat loos. Buat loos mak ita ba kampaña ita lori livru oan ne’e, ita aprezenta ba povu tomak iha ita-nia rai katak se ita manán hodi kaer ukun karik kria kampu traballu ho numeru 60 mill kada tinan. Sé ba mandatu tinan lima rihun-300,” nia informa.
Maibé Ministru Fidelis hatutan, hafoin ukun hamutuk, AMP hatuur programa ne’ebé hato’o ba populasaun durante kampaña hodi nune’e transforma sai programa governu.
Maibé saida mak akontese, nia hatutan, bankada CNRT xumba Orsamentu Jeral Estadu 2020 ne’ebé kontribui mós ba failansu implementasaun politika kampu serbisu ne’e.
“Saida mak akontese, durante debate OJE 2020 bankada CNRT maka vota abstensaun ba proposta orsamentu, ida ne’ebé mak kontribui fallansu koletivu atu atinje kriasaun empregu rihun 60 kada tinan,” dehan nia.
Ho failansu ne’e, Ministru Fidelis promete iha 2023 sei tuun fali ba baze hodi esplika ba povu tanba sa mak la konsege kria kampu traballu ne’ebé mak programa tiha ona.
