Dadus husi IGF ne’e fó sai husi Ministru Agrikultura no Peskas (MAP) Pedro dos Reis durante komemorasaun loron mundial aihan ba dala 13.

Ba ida ne’e, peskizadór ekonomia no agrikultura LH, Mariano Fereira konsidera dadus ne’e la bazeia ba realidade TL nian.

“Timor-Leste la hanesan (nasaun sira iha) Afrika, la hanesan (nasaun iha) Azia sira seluk, maibé ita nasaun ida kiik, populasaun kiik, se koalia hamlaha ita mós la konkorda, tanba realidade ita la hamlaha,” dehan Mariano iha nia knar fatin Bebora, Tersa (20/10).

Tuir nia, sidadaun TL moris ho asaun solidariedade ne’ebé as tebes, tan ne’e bainhira sidadaun ida hamlaha sempre hetan ajuda husi sidadaun seluk.

“Iha TL moris ida ho sosiál ida aas la halimar, maske ema ida osan laiha maibé nia bele moris, tanba hahan ne’ebé ba familia sempre ajuda malu, maibé kompara ho nasaun avansaudu sira inklui Indonezia no nasaun sira seluk Azia ne’ebá kuandu koalia kona-ba hamlaha ne’e pior liu fali TL,” dehan nia.

Tan ne’e, nia husu ba organizasaun internasionál sira atu uza metodu ne’ebé korespondente duni ho situasaun iha TL.

“Ita TL nian ki’ak tanba laiha kapasidade di’ak, laiha manejementu di’ak atu bele dezenvolve ita-nia rain sai produtivu, ne’e iha. Maske populasaun ida nia uma tali, la nahe ho sumente, laiha buat sira seluk, maibé nia iha rikusoin animal no buat seluk iha, entaun signifika Timor la ki’ak,” katak nia.

Kona-ba mánutrisaun, nia dehan, IGF foti liu mak dadus husi Ministériu Saúde kona-ba labarik tinan lima ba kraik ho pursentu 46 mak ho kondisaun isin krekas.

Maske nune’e, nia hatete, dadus husi IGF ne’e atu fó alarma ba governu TL hodi tau prioridade ba setór agrikultura, saúde, edukasaun, no bee-moos.

Molok ne’e, Ministru Agrikultura no Peska anunsia kona-ba dadus husi IGF.

“Tuir dadús Index Global Food hatudu katak sidadaun Timor-oan ho pursentu 36 mak sei  infrenta inseguransa ai-han no nutrisaun iha Timor-Leste, atu hakotu hamlaha no mánutrisaun iha Timor-Leste, estadu tenke investe maka’as no presiza esforsu koletivu,” dehan Pedro.