Adjuntu Komisariu KAK ba Prevensaun no Sensibilizasaun Luis de Oliveira Sampaio hatete, iha KAK nia monitorizasaun ba prosesu teste ne’ebé SEFOPE organiza, KAK identifika katak mosu iregularidade balun.

Nia dehan, KAK hahú akompaña prosesu teste ba trabaladór sira hafoin mosu protesta balun husi kandidatu trabaladór sira.

Iha ninia akompañamentu ne’e, nia dehan, KAK identifika katak funsionariu SEFOPE ne’ebé fó teste ba trabaladór sira la uza kartaun identidade (ID Card) no la uza uniforme instituisaun nian.

“Tanba sa mak ami (la uza ID card), tanba ida ne’e loke fatin ka espasu ba ema seluk ne’ebé laos ezaminadór mós tama iha laran atu haree, atu influensia no atu halo desizaun,” dehan nia iha nia knar-fatin, Tersa (20/10).

Aleinde ne’e, nia dehan, iha mós indikasaun ba iregularidade mak ezaminadór sira mós iha poder atu deside kandidatu ida pasa ka la pasa.

“Sira-nia kriteria ne’e mane bomba rai dala 30, feto dala 15, iha prosesu lao hela ne’e sira haree de’it ema ne’e hanesan nakdoko ou iis boot, sira haruka para tiha, entaun ema la satisfas ho hahalok sira ne’e,” dehan nia.

Iregularidade seluk, nia dehan, KAK mós identifika katak iha prosesu teste ne’e ema balun ne’ebé konsidera hanesan asesor mós ba akompaña prosesu ne’e.

“Tuir ami-nia pontu devista servisu ne’e tekniku laos ema asesor, sira-nia kna’ar atu fó asistensia ba Diretór Jeral sira ou Sekretariu Estadu no Ministru sira, laos ba haree fali kestaun sira iha terrenu ne’e,” dehan nia.

Serbisu ida ne’e, nia dehan, parte ida husi prevensaun nian, tanba tuir artigu 5 lei numeru 8/2009 ne’e KAK nia knaar ida mak atu halo akompañamentu, halo akonsolamentu no servisu hamutuk ho instituisaun sira hotu atu prevene ka taka dalan ba potensia risku sira hanesan ne’e.

Entretantu, molok ne’e, hafoin halo akompañamentu KAK fó sai rezultadu husi serbisu ne’ebé sira halo mak hanesan:

• Ekipa ezaminadór sira iha inisiu la utiliza identidade hanesan ID card no kamizola ka farda, nune’e fó oportunidade ba funsionariu SEPFOPE seluk ne’ebé mak la’os ekipa ezaminadór atu envolve iha teste laran.
• Kualker funsionariu SEFOPE livre atu tama iha area teste tanba laiha regras.
• Kada ezaminadór iha poder atu deside pasa ka lae, tanba ne’e maka akontese kandidatu balun maske bomba rai ka sit and reachla tuir padraun manual nian maibe ezaminadór fó pasa nafatin. Iha parte seluk ezaminadór seluk mos aplika estandarte/padraun ne’ebé regorozu ba sira seluk.
• Ekipa ezaminadór ne’ebé hanesan iha parte ezersisiu teste bomba rai, sit and reach, ne’ebé la efisiensia no iha indikasaun halimar nilaihodi fó ba kandidatu sira ne’ebé maka ezaminadór gosta.
• Tempu ba teste teste halai iha oras meudia ka depoisde oras meiudia rezult kandidatu barak maka la passa tanba la aguenta ho rai manas.
• Ekipa ezaminador SEFOPE sira simu orientasaun husi Diretor Filomeno katak dokumentu sira husi kandidatu sira ne’ebé pasa ka la pasa iha selesaun agora ne’e sei rai hamutuk no lori hotu SEFOPE mak halo entry fila fali;
• Antes ne’e prosesu entry datahalo kedas iha fatin selesaun maibé depois sira halo mudansa atu ba entre fali dadus/data iha kantor – konaba mudansa ne’e CAC intervein kedas no agora prosesu entry ne’e halao fali ona hanesan inisiu;
• Ekipa KAK simu mós informasaun husi ezaminador sira katak asesor sira mak entre data; dokumentu relavente sira husi kandidatu sira hotu entrega ba asesor sira.