“Konsellu Ministrus hala’o sorumutu iha Palásiu Governu, iha Dili, no delibera atu propoin ba Sua Excelénsia Señor Prezidente Repúblika, Francisco Guterres Lú Olo, renovasaun estadu emerjénsia, ba loron 30,” dehan Ministru Presidensia Konsellu Ministru Fidelis Leite Magalaeñs iha Palasiu Governu, Kuarta (21/10).
Tuir Fidelis, renovasaun EE ne’e atu atende ba evolusaun preokupante sira husi situasaun epidemiolójika no proliferasaun ba kazu rejistadu husi kontájiu Covid-19 iha nivel rejionál, no mós nivel mundiál.
Aleinde ne’e, nia dehan, atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde.
Ministru ne’e hatutan, liu husi estensaun husi deklarasaun kona-ba estadu emerjénsia, permite atu suspende ka restrinje direitu sira kona-ba sirkulasaun internasionál, sirkulasaun no fiksasaun rezidénsia no rezisténsia.
Timor-Leste hahú implementa Estadu Emerjensia relasiona ho pandemia Covid-19 iha fulan Marsu nia laran. EE dahuluk hahú iha 28 Marsu no remata iha 26 Abril, hafoin estende tan loron 30, husi 28 Abril no remata iha 27 Maiu.
Bainhira EE daruak besik remata ona, goveru propoin tan ba PR Lú Olo atu estende, no ikus mai ho autorizasaun husi Parlamentu Nasionál PR Lú Olo dekreta tan EE datoluk hahú husi 28 Abril to’o 27 Maiu, tuir mai EE kontinua estende husi 4 Agostu no remata iha 4 Setembru.
Iha fulan Setembru nia laran, governu husu tan EE dalima, no ikus mai PN fó tan autorizasaun ba PR Lú Olo hodi dekreta, hahú husi 5 Setembru no sei remata iha 4 Outubru.
Bainhira EE dalima besik remata, governu propoin tan EE daneen, no ikus mai hafoin hetan autorizasaun husi PN, PR Lú Olo dekreta tan EE daneen hahú husi 5 Outubru no sei remata iha 3 Novembru.
