DILI: Governu Timor-Leste liu husi reuniaun Konsellu Ministru iha Sabadu (28/03) deside ona medida hamutuk 19 ne'ebé sei aplika durante periodu estadu emerjensia.

Dekretu Governu ba medidas estadu emerjensia ne'e iha kapítulu 8 ho artigu 33, ne'ebé rezumu ba regra 19 importante hahú husi suspensaun ba atividade ne'ebé envolve ema barak to'o regra kona-ba atividade komersial.

Tuir mai INDEPENDETE oferese rezumu husi medida ne'ebé Konsellu Ministru aprova:

Suspensaun:

1. Suspende Movimentu Transporte Publiku
2. Suspende Atividade Desportiva Sira Hotu
3. Suspende Atividade Halibur Malu iha Grupu
4. Suspende Atividade Festa
5. Suspende Atividade Kultural ne’ebe Halibur Ema Barak
6. Suspende Vizita Mate Uma Simultanea iha Numeru Bot, Masimu na’in 10
7. Suspende Estranjeiru atu Tama Mai Teritoriu Timor-Leste
8. Sidadaun Timoroan Ne’ebe Tama Mai Teritoriu Tenke Tama Kuarantena
9. Individu Ne’ebe Dezenvolve Sintomas Covid-19 Tenke Hetan Teste Husi Ministeriu Saude
10. Izolamentu Obrigatoriu ba Ema Ne’ebe Afetadu husi Covid-19
11. Izolamentu Obrigatoriu ba Individu Ne’ebe Tama Teritoriu Timor-Leste no Hetan Sintomas Covid-19
12. Proibi Halo Reuniaun no Manifestasaun Ne’ebe Liu Ema Na’in 5
13. Suspende Ativiade Relijozu Hanesan Missa, Sholat, etc

Atividade Komersial:

1. Ba Individu ne’ebe vizita fatin Komersial tenke Uza Maskara Taka Ibun no Inus
2. Fase Liman Antes Tama ba Fatin Komersiu hanesan Loja, Mini Merkadu, Supermerkadu, no Merkadu
3. Mantein Distansia Minimu Metru Ida Iha Fatin Komersiu Sira Mensiona iha Leten
4. Na’in ba Fatin Komersiu Tenke Prepara Fasilidade Fase Liman Nian
5. Na’in ba Fatin Komersiu Labele Husik Ema Ne’ebe La-Kumpre Regra Fase Liman no Latau Maskara atu Tama iha Fatin Komersiu
6. Vendedor Ambulante ka Gerobak Bele La’o Nafatin Maibe Tenke Kumpre Tau Maskara no Prepara Fasilidade Fase Liman Nian

DILI: Iha loron dahuluk implementasaun estadu emerjensia, Sabadu (28/03), maske situasaun iha kapital Dili hakmatek uitoan kompara ho loron baibain, maibé mikrolete balun sei hala'o movimentu hodi buka pasajeirus.