Nia hatutan, hanesan ema hotu hatene, atividade letiva sira iha eskola nivel ensinu oioin no iha Instituisaun Ensinu Superiór sira, liuliu iha munisípiu Dili, hetan ona suspensaun durante fulan balun tanba enfrenta propagasaun maka’as husi Covid-19.
Ho razaun ida ne’e, ohin hahú ona kampaña vasinasaun Sinovac ba estudante no dosente sira no mós komunidade Xineza atu proteze an husi virus Covid-19.
“Ita hotu hakarak prevene propagasaun Covid-19 no kria kondisaun atu normaliza ita-nia sidadaun sira-nia moris. Iha kazu espesífiku husi Instituisaun Ensinu Superiór sira, ita iha ambisaun atu reativa fali atividade letiva prezensiál sira iha instituisaun hotu,”dehan nia iha serimonia lansamentu ba Vasinasaun Sinovac iha Kampus Sentral UNTL, segunda ohin (14/06).
Tanba ne’e, atu konkretiza objetivu ida, presiza asegura katak maioria husi 67.000 dosente, estudante no funsionáriu husi Instituisaun Ensinu Superiór públika no privada sira partisipa ativamente iha kampaña vasinasaun ida ne’e no hetan prosesu vasinasaun ho kompletu.
“Nune’e, ha’u apela ba dosente, estudante no funsionáriu sira hotu la bele ta’uk vasina no aproveita oportunidade ida-ne’e atu proteje imi-nia saúde no família sira,”tenik nia.
Tanba ne’e, labele uza vasinasaun sai hanesan problema ka dezafiu ida, maibé uza vasina nu’udar oportunidade úniku hodi manán virus ne’e no hodi kontribui ba dezenvolvimentu futuru ida ne’ebé di’ak liu ba Nasaun.
Entretantu, Ministériu Ensinu Superiór, Siénsia no Kultura servisu hamutuk ho Ministériu Saúde, define ona postu vasinasaun haat (4) ba membru komunidade akadémika husi Instituisaun Ensinu Superiór Munisípiu Dili nian mak hanesan, UNTL, DIT, Sekretaria Estadu Juventude no Desportu no Asosiasaun Xineza iha Timor-Leste.
Nune’e, dosente, estudante no funsionáriu sira atu hetan vasina, tenke ba iha instituisaun hirak ne’e, hahú ohin, 14 fulan-juñu.
Aliende, instituisaun Ensinu Superiór sira seluk ne’ebé la’ós iha munisípiu Dili nian, sei hetan mós bainhira iha ona posibilidade.
Enkuantu, MESSK mós lahaluha hato’o agradese ba povu Repúblika Populár Xina ne’ebé fó vasina Sinovac no mós kolaborasaun husi Ministériu Saúde no responsável sira Instituisaun Ensinu Superiór nian iha prosesu implementasaun kampaña importante vasinasaun ida ne’e.
Entretantu, Reitor UNTL João Soares Martins enkoraja ba estudante no dosente iha univesidade privadu no públiku atu simu vasina, atu nune’e bele hahú fali atividade aprensizajem ho normal iha teritoriu laran tomak, tantu husi ensino baziku to’o universidade.
Asistente Editor: Saturnina da Costa
