Deputadu PN Konsidera Prado Leilaun Ho $8.000 Normál Featured

By Agostu 15, 2017 2063
Deputada Benedita magno Deputada Benedita magno

DILI: Deputadu Parlamentu Nasionál (PN) konsidera folin karreta prado ne’ebé leilaun ho $8.000 ne’e normál, tanba veíkulu ne’e barak laiha ona kondisaun.

Deputada Bendita Magno hatete, durante tinan lima utiliza karreta ne’e hodi tama sai fatin halo fiskalizasaun. Tanba ne’e, karreta ne'ebé utiliza ne’e balun aat ona no balun xoke mós deputadu sira mak hasai rasik osan hodi halo manutensaun.

“Ami gasta ona osan barak liu fali ona duke karreta nia folin. Atu hatete de'it, balun ne'ebé xoke, sira tenke hasai sira nia osan hodi hadi’a”, tenik nia, iha Uma Fukun PN, horisehik.

Nia hatutan, folin leilaun ho montante $8.000 ne’e atu boot liu ka ki'ik liu, maibé ne’e konsekuénsia ne'ebé tenke simu, tanba hanesan povu mak eleje mai tuur iha Parlamentu Nasionál tenke simu.

“Ba ha'u la dehan satisfás ka la satisfás, maibé ba ha'u normál tanba buat ne'ebé ami gasta ba povu sira ne’e ami nia responsabilidade duni”, dehan Bendita.

Iha fatin hanesan, deputadu Paulino Monteiro hateten, tuir regra karreta prado ne'ebé prepara ba deputadu sira atu uza hodi halo fiskalizasaun ne’e kada tinan lima tenke halo reparasaun ho osan ne'ebé boot, tanba iha fabrika karreta ne’e mós halo nia durasaun ne’e to’o de'it tinan lima.

Nia hatutan, kuandu karreta tuan sira ne’e mak rai, deputadu foun sira mai kontinua uza ne’e sira sei halo manutensaun, entaun lakon tempu ba servisu.

Nia hatutan, atu labele gasta osan boot ba manutensaun, maka deputadu sira uza osan $8.000 halo leilaun. Atu nune’e, parlamentu nasionál bele ajuda aumenta osan uitoan atu bele sosa fali karreta foun ba deputadu foun sira.

“Ita haree fíziku karreta na’in agora ne’e ho folin $8.000, ne’e ita haree ba mai ne’e natoon ona, la sa’e liu la tun liu. Ita haree pas-pas ona, ne’e folin karreta ba tinan lima nian duni, tanba karreta ne’e mo s la’o la kleur bele aat fali ona”, dehan Deputadu Paulino.

Nia hatutan, osan ne'ebé deputadu sira uza hodi leilaun karreta ne’e hanesan kontribuisaun kuandu mamuk liu mós dehan ita la iha ona kontribuisaun oinsá mós ne’e ita ajuda governu para bele sosa fali karreta ba deputadu foun sira.

Alende ne’e, Deputada Florentina Smith hatete, prosesu leilaun ba karreta prado ne’e laiha obrigasaun ba deputadu sira atu halo, maibé ne’e konxiénsia ida-idak nian hodi halo leilaun bain hira haree karreta ne’e sei di'ak.

“Se sira haree karreta ne’e la serve atu uza ha’u hanoin lei ida la obriga kuandu deputadu sira lakohi bele husik hela iha parlamentu, tanba ne’e hanesan aset” dehan nia.

Nia hatutan, folin karreta ne’e parte husi konsellu administrasaun parlamentu nasionál mak enkontru hodi deside, sente katak ho folin ne'ebé iha ona presiza halo avaliasaun, maibé ne’e konsellu administrasaun mak deside ona.

Rate this item
(0 votes)
Last modified on Kuarta, 16 Agostu 2017 14:39

Independente Digital TV