Ho nunee, bele aprezenta ba iha Governu hodi vigora ona lei refere atu bele asegura labarik sira nia direitu.
"Semana rua liu ba, Komisaun F halo ona harmonizasaun ba lei protesaun labarik ne'e, tanba iha artigu balun ba lei ne'e liga ba direitu labarik sira nian, espera katak iha tempu badak, parte Komisaun aprezenta ona lei ne'e ba iha Presidente Parlamentu Nasional hodi halo reavia no husu ba ajendamentu hodi halo diskusaun jeral, nune'e bele halo aprovasaun ba lei refere iha final Global,”dehan nia ba Online INDEPENDENTE, via telephone, kuarta nee (02/02).
Tuir nia, husi lei neebé iha mak bele fó espasu ba Institutu Defeza ba Direitu Labarik atu halo servisu neebé diak liu, liga ho asuntu labarik.
Tanba nee, Institutu Defeza husu ba Komisaun F atu finaliza esbosu lei protesaun ba labarik sira, atu nunee asegura labarik sira neebé hala’o moris iha dalan ninin no sira neebé ajuda ekonomia familia, atu sira labele sai vitima tan.
"Ita espera katak iha tempu badak lei Protesaun labarik bele vigor ona, tanba ho lei mak bele fó espasu mai ami, atu bele halo servisu di'ak liu tan, tanba baze legal ba ninia lala'ok oinsa mak atu reduz labarik sira iha estrada no atu lori labarik sira ba moris di'ak liu tan,”dehan nia.
Nia esplika, relasiona ho labarik sira neebé kontinua faan sasan iha dalan ninin, Institutu presiza iha lei espesifiku ida atu bele kontrola sira.
Tanba dala ruma, hakarak haruka labarik sira fila ba familia, maibé institutu hetan difikuldade tanba laiha lei ida mak koalia espesifiku ba asunto ne'e, entaun bele mós kria polemika iha sosiedade nia le'et.
Enkuantu, Prezidente nee garante, esbosu lei refere sei forte hodi bele kontrola labarik sira.
Entretantu, projetu lei nú 29/V (3a) hetan aprovasaun husi Parlamentu Nasional iha faze jeneralidade iha loron 20 fulan-Setembru 2021.
Ho nunee, tuir dadus neebé Institutu Defeza ba Direitu Labarik rejista, labarik na’in 1.200 mak dadaun nee kontinua faan sasan iha dalan ninin no ajuda familia. Husi númeru nee, maioria husi Rejiaun Administrativa Espesial Oekuse Ambeno (RAEOA).
Asistente Editor: Saturnina da Costa
