"Ami esforsu atu servisu hamutuk ho CNE, oinsa mak atu bele kria regulamentu ne'ebé fó protesaun barak ba labarik sira no bandu maka'as labarik sira atu labele involve iha tempu kampaña, liu-liu ba ita nia kandidatu sira atu labele uza labarik iha kampaña ne'ebé sei realiza iha tinan ne'e," dehan nia ba Online INDEPENDENTE, via telephone, kuarta nee (02/02).
Tanba nee, nia dehan, sei distribui mós materia kampaña nian hanesan brusur ba komunidade sira no ba partidu politiku sira, ida ne'e hanesan mensagen ida atu fó hanoin ba labarik sira atu labele envolve iha kampaña partidu politiku.
Tanba, tuir Konstituisaun Republika Demokratiku Timor-leste (K-RDTL ), artigu 47 neebé koalia kona ba direitu sufrájiu nian, iha pontu ida hatete, sidadaun hot-hotu ho tinan sanulu-resin-hitu (17) ba leten mak iha direitu atu vota no iha pontu rua hatete, hala’o direito sufrájiu ne’e katak kona-ba ema ida-idak, no hanesan devér síviku ida.
Ho nunee, antes atu tama ba loron kampaña, parte Institutu Defeza ba Direitu Labarik sei halo advokasia hodi prepara labarik sira nia impedimentu, nune'e bele halo aplikasaun ho partidu politiku sira atu labele involve labarik sira iha kampaña.
"Ami mós sei dezenvolve materia kampaña nian hodi kompleta, nune'e bele distribui ba inan-aman sira atu hanorin no kontrola labarik sira iha tempu kampaña no tempu votasaun", tenik nia.
Entretantu, molok nee, Prezidente Republika Francisco Guteres Lú Olo, dekreta ona loron eleisaun prezidensial nian neebé sei hala’o iha 19 Marsu 2022.
Asistente Editor: Saturnina da Costa
