Sekretáriu Jerál FRETILIN, Mari Alkatiri hateten, VII Governu Konstitusionál sei apoiu másimu Xefe Negosiadór, Kay Rala Xanana Gusmão, hodi luta ba fronteira marítima to’o hetan ninia rezultadu.

“Governu sei apoiu totál ba ekipa negosiasaun. Sé mak lidera ne’e, maun Xanana ho Ministru Agio Pereira. Sira tenke kontinua to’o fim”, dehan nia, iha Palasiu Prezidensiál, Ai-Tarak Laran, horisehik.

Nia hatutan, negosiasaun ne’e fulan rua tan remata ona. Ne’e duni, pozisaun ne'ebé Xanana Gusmão lidera ne’e tenke mantein luta ba prosesu ne’e.

“Atu hotu iha Agostu ka Setembru, falta ou fulan rua ne’e labele muda negosiasaun ne’e”, tenik nia.

Tanba sei halo hela negosiasaun kompeténsia ho determinasaun sira kontinua a não ser atu muda sira.

“Ha'u mós hatene katak irmaun Xanana ho Agio Pereira sira mós iha sentidu responsabilidade, sira mós hatene katak di'ak liu kontinua”, apoiu Alkatiri.

28 Agostu TL-Austrália Diskute Diferensa

Negosiasaun liña fronteira marítima entre Timor Leste no Austrália sei hala’o fila-fali iha 28 Agostu 2017, hodi rezolve diferensa balun ne'ebé seidauk hetan konkordánsia.

Ekipa negosiadór ne'ebé lidera husi Kay Rala Xanana Gusmão sei kontinua fali negosiasaun ne’e iha tempu badak para atu rezolve diferensa balun.

Primeiru Ministru, Rui Maria de Araújo hateten, progresu kona-ba negosiasaun tasi Timor fó sai ona iha jornál Repúblika, kona-ba deklarasaun imprensa entre parte rua TL-Austrália iha progresu. Maibé, iha pontu balun presiza iha diskusaun finál.

Xefe governu hateten, pontu balun importante tebes. Ne'e duni, parte rua presiza haree fila fali. Tanba ne’e, TL-Austrália sei hasoru malu fali para atu haree asuntu ne’e.

“Ita hein nafatin no espera katak 28 agora bele konsege rezolve diferensa balun ne'ebé mak iha”, tenik nia.

Nia esplika, maski sei iha diferensa buat balun ne'ebé presiza rezolve entre parte rua, maibé kestaun ne’e konfidensiál. Seidauk bele anunsia ba públiku saida mak sei diskute iha liña fronteira tasi timor ne’e.