Primeiru Ministru, Kay Rala Xanana Gusmão fó sai katak, opsaun ida ne'ebé tetu hela mak limita distribuisaun eletrisidade, ne'ebé sei fornese de'it husi tuku 5:00 dadeer to'o tuku 11:00 kalan.

Tuir Xanana, polítika ne’e seidauk implementa, maibé halo parte iha medida mitigasaun karik krize enerjétika mundiál sai aat liu tán tanba konflitu ne’ebé la hatudu sinál atu hotu.

"Karik mak situasaun defisil tebtebes (kombustivel litru) 80 miloens ne'e dala-ruma ba fulan neen. Ne'ebé ha'u informa ba Prezidente Repúblika karik mak situasaun difisil tebtebes, sei aviza katak eletrisidade to'o tuku 11 kalan, tuku 05 dader mak sei loke nune'e ita poupa," dehan PM Xanana hafoin enkontru semanal ho PR Horta, iha palasiu Prezidensial, Bairo-Pite, Kinta (02/04).

Xanana subliña, governu la’ós de’it hasoru presaun folin ne’ebé sa’e, maibé mós ameasa ba fornesimentu kombustivel ne’ebé menus iha merkadu internasionál.

“Ha'u informa ba Prezidente Repúblika katak ita tenke akompaña nafatin funu ne'e, tanba problema laos presu de'it, problema falta venda," dehan Xefe Governune’e.

Iha senáriu ne'ebé prepara, hamenus utilizasaun eletrisidade ne’e foka ba hamenus todan ba konsumu nasionál hodi garante distribuisaun enerjia kontinua la’o iha limitasaun fornesimentu nia leet.

Governu mós husu ba instituisaun públika hotu-hotu no públiku atu hahú poupa eletrisidade, inklui hamenus utilizasaun ba aparellu eletróniku sira ne'ebé la'ós esensiál.

Aleinde ne'e, limita mobilidade veíkulu nian mós halo parte iha opsaun polítika, atu nune'e bele hamenus konsumu jerál kombustível nian.

"Ezemplu de'it, Sábadu-Domingu la servisu, karreta lalika la'o ona, la'o ain,” dehan nia.

PM Xanana hatutan, pasu ne’e nu’udar pasu antisipativu, tanba impaktu husi konflitu ba setór enerjétiku bele lao kleur, maski funu remata, tanba prosesu restaurasaun infraestrutura enerjétika bele lori tempu.

“Problema funu hotu mós sei lori fali tinan bainhira sira halo fali buat sira destroi ona ne'e prodús fali mina atu mai, ne'ebé ida ne'e mak ha'u hakarak aviza ba públiku tomak,” dehan Xefe Governu ne’e.

Entretantu, Prezidente Parlamentu Nasionál, Maria Fernandes Lay mós apoia medida poupansa hodi enkoraja redusaun ba atividade sira ne’ebé fó todan ba orsamentu Estadu, inklui viajen estranjeiru.

Governu konfirma katak sei kontinua akompaña dezenvolvimentu situasaun globál molok deside kona-ba implementasaun ofisiál husi polítika poupansa enerjia ne’e.