×

Atenção

JUser: :_load: Não foi possível carregar usuário com ID: 422

JUser: :_load: Não foi possível carregar usuário com ID: 430

Aman La Sosa Motor, Oan Tara An Featured

By Maiu 09, 2017 1960
Ilustrasaun tara aan Ilustrasaun tara aan

DILI: Tanba ninia hakarak atu sa’e motor la konsege realiza, Deonisio Soares (16), foti desizaun hodi hakotu nia vida.

Iha Kuarta, 3 Maiu 2017, Deonisio husu ba nia aman, José Soares, atu sosa motor Vixion atu nia sa’e ba eskola, maibé nia José rezeita ho razaun nia sei halo hela nia oan feto na’in rua ninia uma.

Iha Sesta (5/5), José hakfodak bainhira haree nia oan-mane tara an ho sintu no talin karta indentidade (ID Card) iha kuartu laran iha suku Riheu, Gleno, Munisipiu Ermera.

“Ha’u ema Agrikultór, ha’u-nia kbiit la to’o no ha’u-nia oan barak ne’ebé ha’u atende ida-idak,” dehan José ba jornalista sira iha salaun mortuariu Hospital Nasionál Guido Valadares bainhira akompaña mate-isin hodi halo autopsia, Segunda (08/05).

José dehan, nia iha osan uitoan iha banku, maibé osan ne’e balun nia uza hodi ajuda hadi’a ninia oan feto nia uma no seluk atu atende nesesidade uma-laran nian.

Maibé, lamentavel tebes, tanba nia oan-mane ne’e lakohi komprende no ho hanoin badak foti desizaun hodi tara an.

Matebian sei eskola iha nivel Pre-sekundaria klase III iha eskola ida iha Gleno-Ermera.

Hafoin haree nia oan tara an, José husu apoiu husi komunidade no kontaktu ba polisia hodi hatuun mate-isin, hafoin lori mai HNGV hodi hala’o prosesu autopsia.

Entretantu, Polisia Nasionál Timor-Leste Munisipiu Ermera loke prosesu investigasaun ba kazu ne’e hodi bele identifika motivu loloos husi kazu ne’e.

Iha fatin hanesan, Ofisial Polisia Investigasaun Munisipiu Ermera, Moises do Carmo afirma, matebian kesi sintu no talin ID Card iha airin hodi tara an.

Maske nune’e, ofisial polisia ne’e dehan, nia parte seidauk foti desizaun katak matebian mate tanba tara an molok prosesu investigasaun remata.

“Prosesu investigasaun la’o hela. Investigasaun mak determina (tara an ka lae),” dehan Moises.

 

 

Rate this item
(0 votes)

Independente Digital TV