Iha akontesimentu ne’e, rezulta bolseiru ida ho naran Acácio sai vítima ne’ebé iha tentasaun husi bandidu sira atu oho nia, maibé la realiza tanba konsege salva-aan husi ema sira ne’e.

Tuir Ministru Edukasaun, António da Conceição konfirma katak, loos duni ministériu simu ona informasaun, maibé imposivel (labele) atu deteta bandidu sira ne’e tanba grupu ne’e eziste barak iha Cabo-Verde.

“Ha’u fó ona instrusaun ba Diretór Jerál Ministériu Edukasaun, Antonino Pires, to’o iha ne’ebá sei bele ba vizita hodi haree loloos estudante sira nia situasaun”, dehan nia, iha bainhira partisipa misa despedida matebian, Mário Carrascalão, iha Igreja Katedrál, horisehik.

Relasiona ho akontesimentu ne’e, bolseiru timoroan sira iha Cabo-Verde husu ba ME atu bele buka solusaun ruma hodi estudante sira bele fokus ba estuda

Maski nune’e, ba situasaun ne’e Governu Timor-Leste presiza estuda no avalia, tanba ne’e kooperasaun bilaterál entre governu rai rua.

Ne’e duni, Ministru António prepara ona karta hodi haruka ba Ministériu Edukasaun Cabo-verde no husu universidade atu haree ba kazu ne’e tanba asaun ruma husi universitáriu.

“Husu mós responsavel universidade ne’e nia atu bele haree tanba konforme ha’u rona universidade ladún hola medida ne'ebé di'ak”, tenik nia.

Nia dehan, fofoun estudante sira tenke atu halo reintegrasaun sosiál ho komunidade iha ne'ebá atu fasil adapta ba situasaun iha fatin ne’ebé bolseiru sira hela ba, maibé infelizmente fatin, fatin ne'ebé sira hela nu’udar problemátiku. Tanba ne’e, bolseiru rasik maka tenke tetu atu muda fatin.

Entretantu, tuir informasaun, ema ne'ebé asaltu bolseiru timoroan ne’e hetan tiru husi polisia parese ema ne’e mate.