Tuir deklarasaun sasin sira liu husi konferénsia imprensa hateten, sira laiha serteza ema ne’ebé tiru ne’e membru polisia ka lae, maibé karreta ne’ebé ema sira ne’e sa'e hakerek CSP.

António da Costa, sasin ne’ebé haree ho matan akontesimentu ne’e dehan, momentu ne’e sira hein hela bís atu ba Baukau, derrepente karreta CSP ne’e para no ema sira ne’e tun husi karreta laran nune’e sira mós kumprimenta, maibé ema ida hasai pistola tiru kedas vítima Guilhermino.

“Ami la konsege haree sira nia hatais ne’e farda polisia ka sivíl, maibé haree de’it mak karreta polisia nian hakerek CSP,” dehan nia, iha Jardín 5 de Maio, Kolmera, horisehik.

Momentu ne’e sira na’in tolu mak la’o hamutuk, maibé depois kilat tarutu sira ta'uk no halai namkari.

Ne’e duni, António husu ba Estadu atu kria ekipa investigasaun independente ida hodi haree didi'ak kazu ne’e, tanba bele hamosu fali problema foun entre povu ki’ik sira ho instituisaun PNTL.

Entretantu, família vítima mós aprezenta ona evidénsia balun ba polisia investigasaun, liuliu kartús pistola ne’ebé deskonfia membru polisia uza hodi tiru joven ne’e.

“Ami iha evidénsia engolpu (kartus) rua ne'ebé ho númeru marka TJ ping 6 no ida seluk TP ping 9”, dehan portavós família vítima César de Silveira.

Nia hatutan, atu halo identifikasaun loloos kartús ne’e sé nian só polisia investigasaun mak hatene, tanba evidénsia hirak ne’e aprezenta hotu ona.

César dehan, kartús musan rua ne’e família vítima sira hili iha fatin akontesimentu.