Deklarasaun Lere ne’e relasiona ho kazu pesoal Polisia Nasionál Timor-Leste (PNTL) tiru mate Tiago Inacio Coelho iha Bebonuk.
“Ba ha’u-nia forsa kuandu ba populasaun nia klaran, lalika (uza) kilat, kilat ne’e tempu laiha ona, kilat ne’e iha tempu funu mak ita kaer kilat oho malu, agora la’os tempu kaer kilat,” dehan Lere.
Lere dehan, iha situasaun balun kuandu ema lori kilat bele responde ho kilat.
“Kuandu ema tuda, kilat Ó tiru fali ne’e ha’u hanoin ne’e la’os professional. Ne’e mak tantu polisia no F-FDTL (tenke) ambitua ita-nia ema sira, lalika konfia demais kilat,” dehan nia.
Entretantu, Ministru Interior Longuinhos Monteiro hatete, kazu Bebonuk iha hela prosesu investigasaun no sistema judisiariu mak bele justifika ninia prosesu ne’e oinsa.
Kazu ne’e mós hetan atensaun husi deputadu sira iha Parlamentu Nasionál. Reprezentante povu husu ba PNTL atu onestu no transparente iha prosesu investigasaun no ezame balistiku.
Deputadu Cesar Valente dezafia dehan, kazu ne’ebé akontese iha Bebonuk sai ona preokupasaun públiku no hothotu tau-matan hela, tan ne’e labele lakon de’it iha dalan klaran.
“Ita tenke haree no observa atu nune’e kazu públiku hanesan ne’e labele lakon hodi la hetan justisa ne’ebé loos,” deklara Deputadu Cesar iha Parlamentu Nasionál, Kuarta (10/05).
Deputadu ne’e husu ba ajente PNTL ne’ebé kaer kazu ne’e atu kaer metin nafatin espiritu servi povu no nasaun tuir orden estadu nian.
Ba preokupasaun husi familia vitima ne’ebé konsidera ezame balistiku ne’e sai de’it hanesan razaun ba PNTL no kazu ne’e sei lakon de’it iha dalan klaran, deputadu ne’e dehan, ezame balistiku mak atu deteta bala musan ne’e mai husi ne’ebé, nia milimetru ne’e hira, no see nia bala musan hodi bele komprova investigasaun ne’ebé la’o ona.
“Ezame balistiku ne’e bele halo iha ne’ebé de’it maibé tenke hatudu nia rezultadu ne’ebé loos katak bala musan ne’e loos duni PNTL nia ou husi ema seluk,” dehan nia.
Iha fatin hanesan, Deputadu Paulino Monteiro hatete, ezame balistiku hanesan faze ida husi investigasaun hodi bele hatene loloos kazu ne’ebé akontese.
Tan ne’e, nia husu ba familia no públiku atu labele pesimista katak kazu ne’e atu lakon de’it iha dalan klaran.
Nia husu mós ba familia vitima atu hato’o keixa ba orgaun kompetente sira hanesan PN, Tribunal no sosiadade sivil sira ne’ebé tau-matan ba serbisu seguransa nian.
