Jestór Prinsipál SEFI, Francisco Borlaku Soares hatete, diagnostika ne'ebé Governu halo liu husi SEFI hatudu rezultadu diagnostika kuaze instituisaun Governu hotu prestasaun servisu la'o ladún di'ak.

Iha parte lideransa no jestaun prosesu barak mak presiza hadi’a iha futuru.

Nune’e, dezafiu barak maka hasoru, tanba ne’e presiza fó solusaun ba malu tuir nia dala atu hadi'a nafatin dezenvolvimentu ba prestasaun servisu instituisaun Estadu sira iha Governu foun mai.

“Iha instituisaun Estadu kuaze hatudu prestasaun servisu la di’ak. La’ós de’it ministériu, maibé sira hotu ne'ebá sé de’it mak simu osan Estadu ita presiza hadi'a liután iha futuru”, dehan Borlaku liu husi semináriu kona-ba governasaun di’ak, iha JL Villa, horisehik.

Presiza hadi'a lideransa no jestaun iha instituisaun Governu hotu, nia fó ezemplu, kaer ukun hanesan kondutór bís karik kuandu halai ba diresaun (jalur) Lospalos labele halai fali ba Likisá. Tanba lideransa ne’e importante atu lori soldadu la’o tuir nia diresaun ne'ebé loos.

Tanba ne’e, iha parte seluk mós mentalidade la’ós buat ne'ebé fasil, maibé importante atu asegura presiza hatene nia dalan.

Liu husi semináriu entre SEFI no instituisaun Governu inklui mós jornalista sira hodi ko'alia liu kona-ba atividade Estadu nian ne'ebé mídia sira promove durante tempu naruk nia laran.

Iha fatin hanesan, Segundu Vise Konsellu Imprensa (KI) Hugo Fernandes hatete, oinsá maka média sira bele kontribui promove boa governasaun, tanba sira nia papél importante hodi hala'o kobertura ba atividade Estadu hotu.

Iha semináriu ne'ebé realiza husi SEFI partisipa husi jornalista, diretór média, no partisipa mós husi instituisaun Governu hanesan MAP, reprezentante KAK, Komisaun Funsaun Publika no funsionáriu públiku sira.