Xefe Estadu Majór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur hateten, eis gerrilleiru Xanana Gusmão ho eis Prezidente Repúblika Taur Matan Ruak hirus-malu dezde iha ai-laran.

Nia konta, Xanana ho Taur Matan Ruak la’ós agora maka haree malu oin la moos, maibé dezde iha ai-laran kedas gerrilleiru na'in rua ne’e hirus to’o ohin loron.

Eis gerrilleiru ne’e dehan, lider na’in rua ne’e hanesan feen ho la'en, ne’ebé dala ruma iha naksalak uitoan sira ‘see kotuk ba malu’, maibé sei fó laran ba malu nafatin.

Jenerál F-FDTL Fitun Rua ne’e dehan, bainhira iha ai-laran maka eis gerrilleiru na'in rua ne’e laran la moos ba malu karik ohin loron entre Xanana ho Taur bele mate ona.

“Agora imi rona dehan Xanana ho Taur haree malu la di'ak, ne’e la’ós foin, maibé sira ne’e lagu lama ona”, tenik Lere bainhira fahe esperiénsia servisu FALINTIL nian ba PNTL ho F-FDTL iha Kuartél Jenerál F-FDTL Fatuhada-Dili, horisehik.

Funu na'in ne'e dehan, keta hakfodak ba asaun sira rua nian, dezde ai-laran kedas eis gerrilleiru na’in rua ne’e hirus malu no di'ak malu fali. Tanba ne’e, lalika preokupa ho atitude lideransa na’in rua ne’e nian.

Tuir nia, ne’e bele mós sai estratéjia ida hodi foti Taur Matan Ruak ba kargu primeiru ministru. Tanba, esperiénsia hanorin ona ema hotu katak antes ne’e, Xanana apoiu Taur ba Prezidente Repúblika.

Nia hateten, diferensa ideia ne’e normál, maibé bazeia ba kompromisu iha ai-laran eis gerrilleiru nunka mais rai ódiu ba malu, vinga-malu no hirus-malu iha diferensa ideia ida.

Iha biban ida ne’e, Lere hateten, realidade iha Timor oportunista, maupagadór, tabeledór mós aproveita hodi buka naran sobu nasaun.