Taur Husu Militante PLP Baukau Ignora Numeru 11 Featured

By Mariano Mendonça Abril 22, 2023 8003
Prezidente Partidu Libertasaun Populár (PLP), Taur Matan Ruak, iha nia komisiu eleitoral, enkorraja militante hotu Munisípiu Baukau, vota ba númeru sorteiu tolu (3), lalikan sibuk númeru sorteiu (11). Foto:Media PLP. Prezidente Partidu Libertasaun Populár (PLP), Taur Matan Ruak, iha nia komisiu eleitoral, enkorraja militante hotu Munisípiu Baukau, vota ba númeru sorteiu tolu (3), lalikan sibuk númeru sorteiu (11). Foto:Media PLP.

BAUKAU: Prezidente Partidu Libertasaun Populár (PLP), Taur Matan Ruak, iha nia komisiu eleitoral, enkorraja militante hotu Munisípiu Baukau, vota ba númeru sorteiu tolu (3), lalikan sibuk númeru sorteiu (11).

Nia dehan, hakarak husu ba inan-aman sira fila husi ne'e hateten ba militante simpatizante no apoiante sira labele haluhan vota ba númeru sorteiu tolu ne'e númeru espesiál.

"Númeru 3 iha ne'ebé imi haree took PLP hatete ba katuas sira mais imi bele hanorin ba sira kraik idak-idak tuir ninian mais vota mai hotu iha númeru 3 bele, númeru 11 mak imi lalikan sibuk, númeru 5 ita familia mais seluk ne'e imi hatete tu iha 3," dehan nia, iha Komisiu PLP, Kampu Darasula Baukau, Kuarta (19/4).

Nia dehan, hanoin mak ida ne'e de'it, hakarak lori estrutura nasionál no munisípiu iha Timor laran agradese ba militante simpatizante sira nia pasiensia, domin no solidariedade badinas bele halibur malu iha ne'e.

Hakarak Rezolve Veteranu

Partidu Libertasaun Populár (PLP) karik manan iha eleisaun parlamentár programa ne'ebé iha importante liu mak hakarak rezolve problema veteranu 0 á 3 ho 4 á 7, tanba sira ne'e mak baze.

Prezidente Partidu Libertasaun Populár (PLP), Taur Matan Ruak hatete, militante hakilar dehan hakarak Taur Matan Ruak lidera dala ida tan, nia dehan, ne'e fuuk mutin ona meta ne'e tanba pinta beibeik. Nia komponente sei la halai sees, uluk inan-aman sira iha ne'e mak dolar hodi hulan bee no hahán tuir iha ai-laran, agora tempu atu halo fali ba sira.

"Ha'u nia fuuk mutin ona meta ne'e tanba ha'u pinta bebeik.Maibé ha'u la sees ne'e la halai sa tan serbisu ho imi serbí imi, uluk ha'u nia inan aman sira iha ne'e dólar nakukun laran hula bee ba ha'u no ha'u nia maluk sira, agora ami nia tempu halo fali ba imi la para antes ami mate hakarak halo hela ba imi," dehan nia.

Nia afirma, tanba ne'e la sees husi inan aman ne'ebé uluk luta, entaun saida mak hanoin atu halo tempu oin mai.

"Ita iha programa ida ko'alia bu'at ne'ebé pentin ke ita tenke halo, depois ida ki'ik ita nia líder husi partidu sei esplika no haklaken ba ita boot sira kada ida ko'alia saida, mais antes ida ne'e ha'u hakarak ko'alia bu'at ida ne'e ha'u haluha tiha ke uluk ha'u mai vizita suku sira iha timor laran ne'e kona-ba saida nian, Veteranu 0 á 3 no 4 á 7. Veteranu 0 á 3 no 4 á 7 sira ne'ebé funu iha baze de apoiu 1975 to'o 1978 imi nia aman, avon, apa, tiun sira iha ne'e, balu mate ona maibé barak sei iha ne'e," nia salienta.

Nia hatutan, 4 á 7 sira ne'ebé tuir sira balu iha ne'e sira levanta ida ne'e, tanba saida mak 8 á 14 hetan osan nusa mak 0 á 3 ho 4 á 7 la hetan osan tanba saida? Foin dadaun 2022 iha orsamentu retifikativu Governu tau tokon U$ 1, Lú Ólo antes nia mandatu hotu nia promulga tiha, CNRT tama mai dehan ne'e la merese hapus tiha.

"Depois Alin Laek dehan maun Xanana mak koñese liu imi loos ne'e mak hamoos tiha imi nia 0 á 3 ho 4 á 7, tanba ne'e imi nia konkista ka luta ida seidauk nahas seidauk to'o rohan, ha'u hakarak imi ba aviza malu para mai hamutuk luta ba imi nia direitu, imi la mesak imi sei konta ho ami, mais imi tenke hamrik labele tuur, hein atu ema tau ba imi nia bandeza sei la akontese," nia dehan.

Nia fó hanoin, Suku mai to'o aldeia ne'e hedi fatuk, hedi tanba saida, tanba fatuk mak folin, krikim folin ema hetan osan, ema hirak ne'e hotu husi neeba depois iha ne'e halo moris fali seluk.

"Tama aldeia, tama suku para saida ha'u nia fatuk no krikil ha'u tuku folin ne'e dalan halo nusa mak osan ba ita, tanba hatun ki'ak no mukit signifika aumenta rendimentu ne'e mai husi osan," nia salienta.

Entretantu, Osan bele mai husi fos, bele mai husi serbisu, halo eskola, halo klínika, estrada para ajuda Kombate mukit no ki'ak iha rai ida ne'e, seluk mak redus maánutrisaun iha Timor-Leste.

"Ita boot sira haree ita nia oan sira mánutrisaun boot 47%, tanba ne'e iha bu'at rua ida halo ita nia rain katak, ida seluk halo ita boot sira hetan osan kreatividade buka dalan halo nusa mak hetan osan, ita nia inan aman sira hetan osan, ami nia ulun ne'e loron kalan buka dalan ba ida ne'e la'ós ami nia aan hanoin imi," nia dehan.

Iha Baukau bele kuda has, kuda númoris hetan osan, fuan hetan osan, tanba Governu sosa, entaun buka Governu hanesan ne'e la hetan, governu dahitu la halo, mais VIII Governu halo, nunu Governu mai halo liu tan.

"Ita iha programa lubuk barak ita halo ona barak ita hanoin atu aumenta tan, ha'u esplika ida ne'e ba imi la'os imi atu rona tanba imi ne'e PLP nanis ne'e para imi ba hatutan," nia salienta.

See mak la tuir PLP saugati de'it, tanba PLP iha programa no Atividade ho Projetu di'ak atu benefisia populasaun no ajuda nasaun hodi hamenus mukit ki'ak iha rai ida ne'e.

PLP Hakarak Lori Timor ba Oin

Prezidente partidu ne'e afirma, PLP sei halo bu'at hotu para ke militante simpatizante sira bele hatete katak vale apena tuir Partidu ida ne'e, tanba Partidu ida ne'e iha ema di'ak no hanoin di'ak para ajuda lori nasaun ba oin.

Hanesan ema hotu hatene tinan lima tuir nia sistema politiku iha Timor tinan lima estadu konvida povu para atu hili fila-fali Partidu ida ne'ebé ukun rai ne'e tinan lima mai oin ne'e bolu dehan sistema alternansia katak la iha ema ida ka partidu ida la mesak ukun nasaun ne'e karik la hetan konfiansa husi povu.

"Tanba ne'e mak iha fatin ida ne'e loke ita nia komisiu PLP nian hodi fó sai ita nia programa ita nia hanoin ita nia programa karik liu ita atu lori Timor ba ne'ebé, ba oin," nia salienta.

Mas la'ós ohin komisiu iha fatin ne'e, maibé iha fulan ida tuituir malu to'o loron 18 Maiu see sala iha fatin-fatin Timor laran tomak halibur malu boot hanesan ne'e no ki'ik liután hasoru malu iha knua, aldeia, suku, munisípiu para troka hanoin hanoin no fahe informasaun atu partidu ida-idak haforsa no hakbit nia aan 21 Maiu bele halibur ema barak liu vota ba nia partidu.

"Ohin la'ós de'it ita mak halo iha ne'e, partidu seluk mós halo, ita-nia aliadu Partidu Fretilin halo komisiu iha Vemasse, CNRT ita-nia adversariu halo iha Manatutu sira seluk iha fatin seluk, hotu-hotu fó nia hanoin ba ita-nia povu kona-ba dalan saida mak tuir atu lori ita nia povu ba moris di'ak," nia dehan.

Tanba ne'e, mak loron ida ne'e loron importante hodi determina futuru Timor ba tinan lima, futuru oan sira nian ba tinan lima.

"Imi vota sala lá'os imi terus loron ida de'it tinan lima, loron ida de'it determina futuru tinan lima nia laran. Hanesan mós 1999 loron ida de'it ita determina Timor ninia futuru ba rohan laek tanba ita hili dalan ba ukun aan hanesan dalan dalan mesak ba ita nia rain," nia dehan.

Tan ne'e mak obrigadu ba militante hotu halibur no lori malu mai iha ne'e hodi abertura ba komisiu ba partidu PLP nian iha ne'e.

Baukau PLP sei Mutlak

Iha fatin hanesan, Koordenador PLP Munisípiu Baukau, Helder Freitas ‘Kamarudin’ afirma, 21 Maiu PLP sei manán mutlak iha Baukau.

Agradese tebtebes ba hotu-hotu maski udan kalan kedas to'o ohin maibé militante husi delegadu, koordenador mai to'o konsege hamutuk iha fatin ne'e maski loron liman de'it mais mai mós fakar hanesan rai henek hasoru prezidente partidu, Taur Matan Ruak.

"Ha'u husu ba belun sira hotu no na’in hirak ne'ebé ohin mai karik kampaña ne'e hotu imi fila-fali ba ida-idak nia suku no aldeia tenke organiza malu para loron 21 Maiu ita rona rezultadu Baukau tenke númeru (1) ida ne'e mak ita-nia hakarak," nia dehan.

Husi ba belun tenke hatutan, labele ta’uk ema ba propaganda iha fatin-fatin hodi ataka belun boot Taur Matan Ruak, husik ba nia lori todan nia mak aban bainrua kumpri iha Maromak nia sorin, ne'ebé lalikan hakfodak.

"Tanba saida mak ha'u ko'alia liafuan ida ne'e, ita iha Baukau figura ida be tinan 24 hamutuk ho ita uniku so Taur Matan Ruak de'it ona tanba ne'e mak ita tenke serbisu maka'as," nia salienta.

Husu liu-liu Veteranu sira ne'ebé ohin iha ne'e balu sikat let karik rona mai lalikan tauk, kuandu hamutuk ho Jeneral Taur Matan Ruak sei tuba metin lori nasaun atu ba oin la'os ba kotuk.

"Husi loron monu to'o loron sa'e ita dasa ona, loron 21 Maiu ita sei lori ita nia maun boot sai Primeiru Ministru dala ida atu hadia ita nia moris ida ne'e mak ita nia hakarak," tenik nia.

Rate this item
(1 Vote)
Last modified on Segunda, 24 Abril 2023 23:11

Independente Digital TV