Prezidente Partidu Demokrátiku, Mariano ‘Assanami’ Sabino hatete, votasaun la’o diak, fiskál sira no órgaun eleitorál sira mós hala’o nia servisu di’ak.
“Ita espera votasaun ida-ne’e sei la’o di’ak no ita hotu espera katak povu nia votu ne’e tenke sai rezultadu ne’ebé povu hakarak, labele iha manipulasaun ruma, labele iha buat ruma ne’ebé akontese tanba direitu povu nian, povu simples nia ita labele manipula ida ne’ebé nia hili, ida-ne’e mak tenke sai rezultadu,” dehan nia, iha Aldeia Rio de Janeiro, Suku Bairru-Pité, Dom Aleixo-Dili, horisehik.
Assanami dehan, hanoin regularmente kada tinan-lima, Timor-Leste halo eleisaun, atu povu ezerse nia funsaun no hatur ukun ne’ebé ke povu nian.
“Bainhira ukun ne’e mosu, ukun ne’e tenke servi hodi deliver fali moris di’ak fali ba povu ida ne’e mak responsabilidade demokratiku ne’ebé mak partidu sira tenke iha, ukun na’in sira tenke iha, iha nasaun demokratiku laiha lider ida-ne’ebé ke mosu teki-teki, maibé povu mak tenke hatur líder ne’e,” nia afirma.
Nia haktuir, entaun bainhira partidu ne’ebé kuandu ka’er ukun tenke deliver moris di’ak la’ós tempu atu ba polémika, konfrontu no halo sasan ne’ebé impata fali dezenvolvimentu hodi la deliver moris di’ak, maibé deliver fali venenu ba povu. Ida ne’e Partidu Demokratiku labele aseita ida-ne’e.
“Hau hanoin tinan 24 ita ezerse nuudar nasaun demokratiku, nasaun ukun rasik aan, ita tenke, manan ka lakon povu mak sei povu sei manan, tanba povu mak hili, ne’ebé partidu hot-hotu tenke simu rezultadu saida mak povu ida ne’e hili, ita hotu tenke hakruuk ba povu,” nia afirma .
Nia afirma, lider polítiku labele halo prediksaun manan ona, hanusa mak hatene manan ona, ne’ebé hotu-hotu tenke hakruk, ohin ne’e partidu polítiku hotu respeitu povu nian desizaun povu ni’an ohin no aban, laiha líder ida mak mai dehan nia manan ka nia atu lakon ona, povu sei hili.
“Partidu Demokrátiku fiar povu ida-ne’e no Partidu Demokrátiku fiar jerasaun foun katak tempu ona atu ita halo tranzisaun ida-ne’ebé demokrátiku, ita respeitu nafatin ita nia aman sira, ita nafatin pasu ida hodi ita nia aman sira la’o ba oin,” nia informa.
Nia salienta, maibé nasaun presiza juvenil, tanba era ida ne’ebé agora ne’e, era ida teknolojia, modern, entaun presiza domina teknolojia, domina informasaun atu bele halo kompetisaun ho nasaun sira seluk.
“Ita la’os dada fali kompetisaun iha rai laran, maibé liu-liu ba rai liur, entaun hau fiar katak joven sira sei hatene oinsá mak atu hili no katuas-ferik, tanba sira mos hatene oinsá mak halo determinasaun no halo jerasional demokratiku,” nia relata.
Nia reforsa, tanba ne’e la’os monarkia ne’ebé fo deit, maibé demokratiku ne’e tenke konkista rasik, ne’ebé jerasional tenke povu mak deside, la’os lider ida mak deside.
Prediksaun PD hetan kadeira hira, nia raleta, ida ne’e hein deit, tanba horseik ka hori-bainrua hot-hotu prediksi hakarak bele 12 ka 15 kadeiras.
“Maibé ohin laiha tan numerika ona, entrega ba povu, povu mak sei deside, tanba ita kuandu halo projeksaun ne’e, iha momentu kampana ne’e, maibé momentu eleisaun ne’e laiha projeksaun ida, ne’e povu mak sei determina, ida deit mos ita tenke simu ona ho situsaun povu, povu mak sei deside, ita hein katak povu sei deside lolos, atu futuru povu ida ne’e, liu-liu ba joven sira promove atu bele compete ho nasaun sira seluk,” tenik nia.
