Nia dehan, votasaun la'o di'ak hela, parabéns ba STAE no CNE, polísia, F-FDTL, autoridade sira hotu-hotu ba tempu sira ne'e servisu makaas.
Nia hateten, akomapaña situasaun, informasaun balun, hanesan la kompletu, balun tendensiozu maibé sempre koordena ho komandante polísia verifika. Purtantu polísia ho forsa atentu loos iha fatin hotu-hotu atu evita problema sira purtantu la'o di'ak.
"Ha'u fiar líder sira hotu-hotu no líder sira nia reprezentate iha fatin hotu-hotu, ha'u apelu ba kalma, disiplina, hatudu partidu sira nia maturidade, respeita povu nia direta soberanu atu vota, rezultadu mai ita hotu-hotu simu de'it ne'e rezultadu ne'ebé mai husi povu. Povu simples, povu ne'ebé póder nia iha mak kada tinan lima ezerse póder ida ne'e, nia mak hili ita. Ne'eduni ita hotu-hotu komportamentu di'ak ba povu bele moris hakmatek a oin," dehan PR Horta, iha Sede Suku Metiaut, horisehik.
Tanba ne'e, nia fiar katak líder partidu polítiku sira, bainhira líder polítiku signifika mehi, ambisaun planu atu governu mai.
Purtantu líder polítiku mak tenke númeru ida halo apelu respeitu malu simu rezultadu ne'ebé mai husi eleisaun ida ne'e, povu nia direitu soberanu atu hili líder sira povu kiak, loron terus mehi atu hetan vida di'ak.
Tanba, sira espera Govenu ida mai matenek ho vizaun atu ekonómia bele haksoit ba oin, hatun kiak, susar atu bele fó atensaun bo'ot liu ba kosok oan, inan, ferik katuas sira ba oin.
Nune'e, kria empregu ba joven sira, oportunidade di'ak ba joven sira ba estuda halo desportu, prátika kultura.
"Partidu se mak manán, manán ho omilidade, se mak lakon simu ho dignidade, sempre komplikadu se laiha maiória absoluta primeiru partidu mais votadu tenke buka kedas partidu ida ka rua atu forma koligasaun, post eleitorál bele hetan maiória Parlamentu," hatete nia.
Iha fatin ketak, Prezidente Parlamentu Nasionál Aniceto Guterres hateten partidu ne’ebé de’it mak manán eleisaun parlamentár tinan ne’e tenke servi povu.
“Sira ne’ebé manán tenke servi povu, ukun ho di’diak no sira ne’ebé la manán mós sira tenke asume sira nian responsablidade, servisu maka'as nafatin ba interese Estadu interese povu ninian. La signifika la manán agora, maibé servisu nafatin, loron seluk sei manán bele to’o idak-idak nian esperansa idak-idak nian espektativa,”dehan nia.
Tanba ne'e, nia louva matoridade povu Timor Leste nian, tanba hahú husi prosesu eleitorál to'o ohin loron buat hotu lao di’ak, kampaña eleitorál la’o di'ak, nu'udar povu sidaun Estadu direitu domókrátiku mais manduu liu tan mais tasak liu tan ejerze direitu demokrátiku iha rai ne’e.
“Ha’u hein katak buat hotu la’o di’ak to’o kontajen votu tuir kedas ho prosesu formasaun Governu no ha'u hein katak parte hotu-hotu asume ninian vitoria, balun ne’ebé lakon mós tenke hatene asumi responsablidade,” haktuir nia.
Nia hateten, demókrasia mak ne’e, sé iha frade ka iha krimi ruma karik iha dalan atu rezolve, hotu-hotu mantein kalma la'o tuir be regras, la'o tuir lei ne’ebé prevee atu prosesu eleitorál la'o di'ak, lori rezultadu nufim.
Nia haktuir, sé mak manán nia mak tenke manán, ida ne'e mak hotu-hotu nia objetivu, povu mak tenke manán no sentidu depois de eleisaun, sé mak manán atu servi povu. Servi ho loloos, haree ba iha erru saida mak la'o iha pasadu, saida mak seidauk di’ak, tenke hadia atu ukun sira ne'e hotu tenke benefisia povu.
Tanba tinan 20 restauransaun independénsia ema hotu sei asiste sente katak ukun durante tinan 20 iha fatin-fatin povu sei halerik iha área eletrisidade, iha área bee moos aihan ho infraestrutura bázika sira seidauk prontu liu-liu iha setór edukasaun ho saúde.
“Ita sei iha dezafiu barak ha’u hein katak, eleisaun ida ne’e lori rezultadu ne’ebé halo sira ne’ebé ukun ne’e, tenke hasoru dezafiu sira ne’e, hodi rezoleve duni problema povu nian.Responde duni expektativu povu nian no responde duni povu nian halerik," tenik nia.
