Prezidenti CNE Agustino Belo hatete, krime eleitóral sira ne'ebé akontese mak hanesan, militante husi partidu CNRT na’in hitu (7) kanek, bainhira hetan atake husi ema deskoñesidu iha Uatulari, hafoin fila husi kampaña eleitóral Partidu CNRT iha Vikeke.
Tuir mai kampaña CNRT ninia iha Baukau, militantes sira atu fila ba Venilale no Fatumaka hetan tan tuda husi ema deskoñesidu iha área Uailili nian no rejulta ajensia polisia na’in ida (1) mak hetan kanek.
"Kampaña CNRT nian iha Baukau mós iha ema balun ne'ebé uza atributu (faru) partidus seluk mak ba tuir kampaña CNRT nian, nune’e CNE haruka ona karta ba parte sira atu haree,”dehan nia ba Jornalista sira iha Salaun Media CNE, Kolmera, segunda (24/04).
Aleinde, nia dehan, iha Munisipiu Manufahi, bainhira Partidu Frente Revolusionariu Timor-Leste Indepedensia (FRETILIN), halo kampaña, joven mane ida koko halo perturbasaun.
“Ba kazu ne’ebé akontese, agora dadaun CNE hamutuk ho Polisia investigasaun hare hela kazu refere, bainhira kazu ne’e tama iha kategoria krime, sei haruka ba iha Ministeriu Públiku hodi hola pozisaun,”tenik nia.
Prezidente CNE hatutan, tuir artigu 65 konstituisional katak orgaun indepedente ne’ebé iha kompetensia atu halo supervizaun ba atus eleitóral hotu mak CNE.
Tanba ne’e, CNE apela ba partidus politikus no mós militantes no simpatizantes sira atu nafatin respeita malu, mantein regras iha tempu kampaña eleitóral, nune’e kampaña bele la’o ho di’ak.
