Maibé, atu bele realiza, Undertim sei deve osan billaun $46 husi banku Federal Amerika nian.

Prezidente Undertim, Francisco Guterres ‘Manu Boy’ hatete, bainhira povu tau konfiansa ba partidu ne’ebé nia lidera hodi kaer ukun, sira sei deve osan iha banku Federal hodi dezenvolve Timor Leste sai hanesan Singapura.

“Ha’u, Prezidente Undertim, ha’u-nia kompaña naran Lubulari, Lda, ha’u ba deve osan iha banku Federal billaun $46, aprova ona billaun $5 atu lori mai Timor Leste, maibé oitavo governu lakohi asina. Maibé agora ha’u hein see mak ba ukun, CNTR ka Undertim mak sa’e, ha’u dezenvolve nasaun ida ne'e durante tinan lima nasaun sai hanesan nasaun Singapura,” deklara Francisco ba jornalista sira liu husi konferensia imprensa iha Sede Nasional Underim, iha Bekussi, Dili, Kuarta (19/04).

Aleinde ne’e, nia dehan, bainhira povu fó konfiansa ba Undertim hodi kaer ukun, nia sei hadia mós Planu Estratejiku Nasionál.

“Se povu ida ne’e fó fiar ba ami, Undertim, ba ukun, ami sei hadia planu estrajetiku foun ida hodi define area prioridade, kada tinan tau osan hodi dezenvolve Timor Leste, tanba planu estratejiku iha uluk maun boot Kay Rala Xanana Gusmão halo ne’e sala, governu troka-malu lakohi kontinua programa, maibé Undertim ukun sei hadia uluk planu estratejiku dezenvolvimentu 2023 to’o 2030,” deklara nia.

Durante ne’e, nia hatutan, governu troka-malu ukun no gasta ona osan kuae billaun $23 maibé dezenvolvimentu kontinua hakdasak.

Ida ne’e, tuir nia, aleinde problema iha planu estratejiku, tanba mós laiha lei hodi regulla investór internasional tama iha Timor Leste.

Nia esplika, bainhira lei investimentu laiha, investór internasional sei la sama ain iha Timor Leste.

“Undertim iha planu no programa diferentes ho partidu politiku sira seluk. Bainhira hetan fiar, investór Internasional tenke tama iha Timor Leste dezemvolve Timor Leste sai hanesan nasaun Singapura,” nia afirma.