Tuir eis Prezidente Repúblika ne’ebé asume hela kargu Primeiru Ministru ne’e, durante ukun rasik an ne’e, frakeza boot husi lider sira mak hada’u-malu ukun no haluha tiha povu kiik no kiak sira.
"Inan-aman sira, tinan oin ita kompleta tinan 24 ita sai husi ukun Indonézia nian, ita sukat no sura took saida mak ita halo di'ak liu uluk Indonézia halo no saida mak ita halo aat liu iha Indonézia nia matan iha tempu uluk nia halo. Kuandu ita hatene ida ne'e, ita bele aprende, ‘reza ha'u beik sala, beik sala, la di'ak liu’, se ita la rekoñese ida ne'e, ita labele ba oin," dehan Prezidente Partidu Libertasaun Popular (PLP), Taur Matan Ruak iha kampaña loron dahuluk PLP nian iha kampu Darasula, Munisipiu Baukau, Kuarta (19/04).
Tuir nia, dalan di’ak liu ba oin mak rekoñese sala.
“Sala saida no problema saida iha tinan 20 resin, dezde 2022 mai to'o 2022, kompleta tinan 18 lakon tempu de'it, se lakon tempu de'it halo nasaun sai fraku, ekonomikamente fraku no sosialmente dezorganizadu, kulturál no espiritualmente konfuzu, tanba saida? tanba líder sira fraku.”
"Tanba líder sira fraku, fraku ida ne'e inklui ha'u, ha'u la fase ha'u-nia aan tanba mós ha'u-nia aan ba sala ne'ebé ha'u halo. Inklui ha'u, tan saida tempu naruk lakon tempu hada’u-malu atu ukun mais nunka hanoin povu iha foho ne’eba ki'ak no mukit. Buat barak ba ko'alia mais hotu tiha haluha, la halo, promesa ba povu sira sai tiha kampaña iha rai ida ne'e, labele.”
"Tanba ne'e dala-barak ita konfesa, konfesa ohin, aban ita halo fila fali, bainrua konfesa, halo fila fali. Maromak dala-ruma bulak ho ita tanba de'it ita nunka aprende ho ita-nia sala," deklara nia.
Labele Insulta Adversariu Politika
Iha biban ida ne’e, Prezidente PLP ne’e mós apela ba militante, simpatizante, no líder PLP tomak atu labele insulta adversariu politiku sira, tanba bainhira insulta no trata-malu sei lakon razaun hotu.
"Iha kampaña no iha fatin-fatin, ita-nia adversariu sira trata ita no insulta ita, tanba saida mak sira trata ita no insulta ita? tanba sira laiha programa, bainhira ita komesa insulta ema, ita lakon razaun ona.”
"Maun José Belo haruka mensajen ida ba ha'u dehan ‘adversariu sira trata maun, ita simu ka lae?’, ha'u dehan ba sira ‘Jesus hatete se o basa (hasan) sorin, fó tan sorin’, ne'e hatudu katak ita uluk manan Indonézia sira no agora mós manan tan sira, ita la odiu."
“Maromak hatete ‘husik nia halo ba, tanba nia la hetene saida mak nia halo’. Tanba ne'e ha'u hakarak aproveita iha fatin ida ne'e apela ba militante, simpatizante, líder PLP nian iha Timor laran tomak par iha ne'e ba oin labele insulta ema, ko'alia mak ita-nia programa, ita halo ona balun, iha tan par hanoin halo tan tinan lima mai oin," deklara Prezidente partidu ho númeru sorteiu 3 ne’e.
Tan ne’e, nia afirma, lalika lakon tempu atu insulta ema seluk, hanesan Jeneral boot ida husi Fransa, Napoleao, hatete katak adversariu halo sala husik, labele ba perturba nia, husik nia halo sala tanba kuantu mais nia halo sala, ida seluk avansa ba oin.
"Tanba nia kuandu halo loos ita mak sala fali, kuandu ita mak halo sala nia mak halo loos fali, mais nia halo sala bebeik, ita loos ba bebeik," dehan Taur.
