Prezidente Partidu Libertasaun Populár (PLP), Taur Matan Ruak hatete, PLP iha planu atu atu hatama tratór fila rai, dulas no koa haré hodi hasa’e produsaun no hamenus sosa foos husi rai li’ur.

"Ami-nia planu ba aban-bainrua, ami hatama trator iha Timor laran tomak, fila rai no trator koa hare, dulas, hodi ita faan rame-rame par seguransa hahán, ita lalika sosa mai husi malae nia rai, se sosa (husi li’ur) ita haruka osan ba inan-aman malae nian, sosa ita nian, ita haruka osan ba ita-nia inan-aman iha suku.”

“Ko'alia kona-ba agrikultura, iha belun balun dehan hanesan ne'e ‘maun aban-bainrua fó trator ba ami’, ha'u dehan ‘ok’. Ha'u konta lai istória ida, ita-nia problema iha Timor (mak) seguransa alimentar, kuandu governu ida ne'e simu posse iha 2018 fos iha Timor rihun 42 tonelada mak produz iha momentu ne’ebá, maibé Timor-oan kada tinan haan rihun 130 tonelada. Menus ba hira? Ita-boot sira, haré ita produs de'it 42 ribu (tonelada), haan (rihun) 130 (tonelada), menus rihun 92 tonelada, ne'e ita ba foti iha ne'ebé? Ba sosa iha Tailandia, ho Sesta Bázika agora tinan kotuk ita-nia produsaun foos sa’e ba rihun 86 tonelada, krize mais ita aumenta produs foos iha Timor."

“Entaun saida mak Governu foin lalais tau $50 miloens ho funan ki'ik, par kompaña ne'ebé hakarak halo toos, natar, nia foti osan ba halo toos ,natar, maibé osan ne'e sira seidauk uza hotu.”

"Ita-boot sira haree iha ita-nia rain, iha problema ida bolu mánutensaun, ita-nia oan sira 47% mak populasaun Timor mánutrisaun, par kombate ida ne'e saida mak ami rezolve, ami kria programa ida bolsa da mae jerasaun foun."

“Uluk mai iha suku sira inan-aman nia liurai sira dehan ‘Prezidente, Governu dehan povu kuda, Governu sosa, mais realidade povu kuda, governu sa'e fali’, mais oitavo Governo nia tempu Sesta Bázika sosa povu nian, fó fali ba povu,” dehan nia.

Taur hatete, uluk Governu dehan povu kuda, governu sosa, mais ba sosa fali iha Tailandia hodi mai faan fali iha TL. Maibé, Governu ne’ebé Taur lidera bandu atu halo ida ne’e.

"Ha'u haruka bandu, labele sosa, se sosa, la fahe, tau iha armajen, kuandu hahán la iha bele fó, mais sosa see nian? sosa povu nian, imi haree diferensa," katak nia.

Tan ne’e, Taur afirma, iha governu foun mai sei fahe trator ba agrikultór sira iha Timor Leste tomak.

Foku ba Dezenvolvimentu Fiziku-Naun Fiziku

Entretantu, Prezidente PLP, Taur Matan Ruak kompromete, bainhira PLP manán iha eleisaun no ukun ba dala rua, sei foku ba dezenvolvimentu fiziku no naun-fiziku.

Nia esplika, dezenvolvimentu fiziku mak haree ba estrada, aeroportu no buat seluk ne'ebé boot, no dezenvolvimentu naun-fiziku mak foku liu ba ema-nia moris.

"Ita iha modelu rua par halo dezenvolvimentu, ida, dezenvolvimentu fiziku; halo estrada, aeroportu, buat hotu ne'ebé boboot. Rua dezenvolvimentu naun fiziku; ba ema. Tolu, ita bele halo buat rua ne'e dala ida. Ha'u governu, hili rua dala ida, mais fó prioridade liu ba ema," dehan nia hafoin komisiu eleitoral iha Kampu Beloi, Munisípiu Vikeke, Sabadu (22/04).

Atual Primeiru Ministru ne’e hatutan, bainhira PLP manan no ba ukun sei hametin no haburas programa sira hotu ne'ebé mak iha, no prioridade boot ida mak veteranu 0 to’o 3 no 4 to’o 7.

"Ita tenke luta, ha'u hakarak husu ba foin-sa'e sira par ajuda, tanba ne'e sira nu'udar imi-nia aman, imi-nia avo, ne'ebé uluk funu, entaun ita luta par sira hetan, ha'u fiar katak ita hetan," nia dehan.

Nia dehan, iha tempu rezistensia, sira barak mak terus no mate atu Timor Leste bele ukun rasik an. 

“Mate, terus par Timor ukun aan bele, nusa mak buka moris di'ak labele? Moris di'ak signifika saida? signifika povu nia uma di'ak, ahi iha, bee-moos iha atu inan feton sira labele ba kuru dook.”

“Baukau kuru bee dook, Lospalos kuru bee dook, sira husu ‘maun Taur Matan Ruak, ami nia bee iha ka lae?’, Vikeke kuru bee dook, Manufahi, ida ne'e ami tau $64 miloens dada bee ba imi, tempu badak imi sei aproveita," nia dehan.

Taur mós hataan ba komentariu balun ne’ebé hatete katak governu ne’ebé nia lidera la halo estrada.

"Sira dehan hanesan ne'e ‘Oitavo Governu la halo estrada’, imi nian Vikeke ne'e ha'u mak haruka halo, ha'u kuandu Primeiru Ministru ha'u-nia Ministru mai ona 2018 ka 2019 karik. CNRT dehan ita la halo estrada, metru ida mós la halo, ne'e la loos, ita halo, Baukau ba Vikeke atu hotu ona, ita mak halo, Dili-Baukau la hotu, ita-nia Governu tama hatutan to'o hotu. Agora ita prepara Lospalos ba Iliomar, Uatukarbau ba Uatulari, Vikeke ba Luka tutan ba to'o Suai, ita prepara," nia dehan.

Maske halo ona dezenvolvimentu fiziku sira, maibé, Taur rekoñese katak balun sei lao neneik tanba tenke hasai osan balun hodi atende ba povu nia nesesidade sira seluk.

“Halo neneik aeroportu ho sira seluk neneik, tanba hasai osan balun haruka mai Suku. Uluk lae, halo de'it mak estrada depois povu bosu de'it, agora lae haree uluk ema hafoin mak estrada. Tanba ema mak uza estrada, estrada ne'e la'os ba animal ka lae, tanba ne'e mak ita tenke halo.”

Nia dehan tan, programa hirak ne’ebé iha balun ba tempu badak, balun tempu mediu no balun ba tempu naruk. Programa ba tempu badak liga ba ema nia moris, ba tempu media no naruk ne’e liga ba nasaun nian hanesan portu no aeroportu.

"Estrada haleu Timor ita sei halo hotu hafoin mak ita sei halo suku ba aldeia, mais imi Uatulari nian sei halo ba Laisorolai, agora Weaka ba Kelikai liga ba Nahareka-Ossu.”

“Tanba saida mak ita halo estrada menus, auto estrada avo Nana haruka halo ha'u haruka para tiha, tanba saida auto estrada ne'e kilometru 1 gastus $11 miloens, agora dehan para lai, entaun osan sira ne'e haree uluk lai mai suku, ferik katuas, joven, koa uitoan-uitoan tanba laiha osan.”

“Ida ne'e hanesan aman sira tein, nia suru mai meza, nia subar uitoan par ida mai ikus ne'e haan, dala-ruma to'o sira-nia tempu ne'e hahan laiha. Ita-nia bainaka haan uluk mak uma nain haan, sira nian sira haan uluk mak bainaka haan. CNRT nian uma-na'in haan uluk mak bainaka haan, ita nian bainaka haan uluk mak uma-na'in haan."

“Entaun nia uitoan-uitoan ba ajuda inan-aman sira kbiit laek harii uma, ida seluk mak aumenta produsaun toos-natar sira labele husik, sei kria kondisaun ba inan-aman no joven sira par dezenvolve rai ne'e,” dehan Prezidente PLP ne’e.