Kazu konfronta ne’e nu’udar kontinuasaun husi kazu Bebonuk, ne’ebé hamate vítima Tiago Inácio Coelho tanba deskonfia hetan tiru husi pesoál PNTL balun, iha inisiu fulan-Maiu ne’e.

Iha akontesimentu ne’e PNTL konsege identifika suspeitu na’in 11 ne’ebé agora daudaun halo hela identifikasaun hodi hein mandadu kapturasaun hodi ezekuta.

“Ita nia polisia investigasaun mós kontinua hela prosesu hela atu buka tuir autór balun ne'ebé envolve ba kazu ne’e”, dehan Komandante Operasaun Nasionál PNTL, Superintendente Xefe Henrique da Costa, iha Kuartél Jerál PNTL Kaikoli-Dili, horisehik.

Nia hatutan, iha prosesu identifikasaun ne’e polisia mós deskonfia ema importante balun envolve direta iha konfrontasaun hodi estragu komunidade nia uma 13 no hetan sunu no ida sunu.

Ne’e duni, Henrique apela katak komandu sei la tolera bainhira pesoál seguransa balun envolve kazu ne’e. Komandu rasik sei foti desizaun imediatamente hasoru pesoál ne’e.

Nia dehan, númeru ba konfrontasaun kontinua sa’e makaas iha fulan Maiu nia laran, tanba ne’e komandu kontinua orienta membru sira hodi hasa’e volume patrullamentu, inklui husu apoia seguransa ba Unidade Espesiál Polisia (UEP) ho Polisia Militár (PM) hodi normaliza hikas situasaun.