Operasaun ne’e sei kompostu husi membru Polisia Nasionál Timor-Leste (PNTL) no unidade Polisia Militár (PM) F-FDTL.

Komandante Daruak PNTL Munisípiu Dili, Superintendente Asistente Euclides Belo hatete, operasaun ne’e bazeia ba Lei nú.5/2017 kona-ba Armas Branka.

Nia dehan, hahú semana oin PNTL sei koordena ho PM inklui autoridade lokál Munisípiu Dili atu halo operasaun tama-sai bairru hodi hamoos lema arte-marsiál no arte-rituál sira, inklui rama ambon.

Euclides hatete, Komandu identifika ona área sira ne’ebé risku ba konflitu no sei hala’o uluk operasaun iha área hirak ne’e.

Operasaun ne’e, nia dehan, sei rigorozu, bainhira kaer kona sei kaptura hodi prosesa tuir Lei Armas Branka nian.

“Pena iha ona, bainhira operasaun nia laran mak identifika prosesa tuir lei”, dehan Euclides ba jornalista sira iha nia knaar-fatin, Kaikoli-Dili, Kuarta (7/6).

Nia dehan, sidadaun ne’ebé komete arte-marsiál no subar sasán kro'at sei hetan prizaun tinan tolu ba leten, no ba ajente estadu nian ne’ebé envolve arte-marsiál no arte-rituál, inklui subar rama ambon sei hetan kastigu tinan 6 to’o tinan 10.

Tan ne’e, nia apela ba sidadaun sira atu hamoos lema arte-marsiál no arte-rituál ne’ebé pinta iha moru huun no didin-lolon, inklui soe rama ambon, molok operasaun ne’e hahú.

Nia hatutan, bainhira kaer toman ema pinta lema arte-marsiál no arte-rituál iha moru-huun ka didin-lolon sei selu koima $50- $500.

Kona-ba sosializasaun ba Lei Armas Brankas, Komandante Daruak ne’e dehan, sosializasaun ba lei ne’e hala’o ona.