Segundu Komandante PNTL Munisípiu Dili, Superintendente Asistente Euclides Belo hateten, ba militante partidu polítiku sira bainhira halo konvoiu keta kontra sinais tránzitu ho rodoviaria. Labele prezudika atividade sosiál sidadaun sira iha ekonomia no sosiál.

Nia dehan, komandante hatún orden ba membru sira atu halo kontrola ba militante partidu polítiku sira bainhira halo kampaña ka konvoiu iha sidade Dili laran.

“Estrada ne’e fatin públiku la’ós partidu nian hodi okupa fali estrada no taka dalan ba ita nia komunidade sira nia atividade”, dehan Euclides, iha Komandu PNTL Munisípiu Dili, Kuarta (14/6).

Nia haktuir, komisaun organizadora partidu politiku sira tenke organiza didi'ak militante sira baihira halo konvoiu ka kampaña tuir regra.

Komandante ne’e reforsa, bainhira militante sira maka uza motór kanu racing Polisia sei prende halo infrasaun ba motór sira ne’ebé uza kanu investe, tanba fó impaktu iha sidade laran.

Nia afirma, bainhira militante sira sadik malu polisia sei uza asaun rigorozu hasoru militante sira ne’ebé provoka malu hodi hamosu konflitu iha Dili laran.

Tanba ne’e, komandu mós fó alerta ba membru sira sira hodi fó seguransa másimu iha fatin públiku sira atu labele mosu dezentendimentu entre militante sira.

Haforsa Seguransa iha Tempu Kalan

Entretantu, Segundu komandante Munisípiu Dili dehan, Komandu Jerál PNTL hatún ona orientasaun ba komandante Polisia Munisípiu Dili atu halo seguransa másimu iha área konflitu ho operasaun.

Komandante ne’e haktuir, molok tama eleisaun PNTL sei haforsa seguransa iha Dili laran, inklui fatin sira ne’ebé identifikadu ona sai poténsia ba konflitu.

Nia dehan, seguransa ne’e rasik PNTL Munisípiu Dili sei fahe ba sip kalan-loron atu garante seguransa hodi labele mosu konflitu.

Unidade Polisia kontinua apoiu Komandu Munisípiu Dili hodi fó siguransa iha sidade laran. Alende ne’e, F-FDTL mós apoiu PNTL hodi hametin seguransa ba eleisaun ho kampaña nian.