Segundu Komandante Jerál PNTL, Komisáriu Mateus Fernandes hateten, membru ne’ebé halo juramentu dala rua ne’e kontra lei dixiplinár PNTL, tanba ne’e instituisaun sei loke prosesu ba membru sira ne’ebé halo juramentu ho partidu polítiku tuir akuzasaun deputadu sira nian.

Nia hatutan, polisia tenke tuir de'it regra konstituisaun katak juramentu dala ida de'it ba konstituisaun no bandeira RDTL, seluk husi ida ne’e laiha ona.

“Karik iha evidénsia katak entre ami ruma jura ba polítiku hafoin investigasaun mak ita sei haree,” dehan Komisáriu Mateus, iha Akademia Sentru Formasaun Polisia, Komoro, horisehik.

Nia hatutan, di’ak liu tenke haree ba prova sé mak ba juramentu ne’e, karik iha loos duni maka sei foti medida ba membru ne’e.

“Ha’u hanoin ita lalika jeneraliza ho lista, orasida iha investigasaun mak ita sei haree nia envolve duni ka lae,” dehan nia.

Mateus hatutan, labele haree de’it ba lista, tanba ema seluk mós bele halo lista ka hakerek lori ba dehan ema sira ne’e ba jura no envolve iha ne'ebá, tanba ne’e tenke identifika.