Segundu Komandante PNTL, Komisariu Faustino da Costa dehan, Komandu kompleta ona ekipamentus balun ba Ekipa Anti Terorista ne’ebé mak remata ona sira-nia kursu durante fulan tolu iha Portugal.

“Ita haruka sira na’in 25 ba tuir kursu no na’in rua la konsege remata kursu tanba moras, no ita agora kompleta ona ekipamentus balun ba sira no balun mak seidauk,” dehan Komisariu Faustino ba Jornalista iha Kuartel Jerál PNTL, Kaikoli, Segunda (23/01).

Nia dehan, ekipa ne’e prontu atu hala’o servisu bainhira de’it governu no Estadu presiza, sira na’in 23 ne’e kolokadu iha Unidade Espesial Polísia (UEP).

Nia hatutan, Komandu entrga ona ekipamentu hodi apoiu Ekipa ne’e ba halo operasaun iha area hirak ne’ebé mak importante hodi halo kontrolu ba droga. 

“Ita-nia membru na’in 23 ne’e prontu atu hala’o serbisu ka intervensaun bainhira de’it estadu ne’e presiza sira,” dehan Faustino.

Kona-ba planu atu sosa asu hodi identifika droga, Komisariu Faustino dehan, planu ne’e seidauk realiza tanba haree ba kondisaun no ambiente Timor-Leste la merese atu hakiak asu hirak ne’e. 

Ekipa Anti Terorista PNTL tuir kursu iha Portugal hahú iha fulan Outobru to’o Dezembru tinan 2016. Kursu ne’e sira hetan husi Guarda Nasional Republikana (GNR) Portugal. 

Kapasita Komandante Munisipiu Hotu

Entretantu, atu asegura prosesu Eleisaun Jeral 2017, Polísia Nasionál Timor-Leste (PNTL) sei hala’o kapasitasaun ba Komandante Munisipiu sira hotu.

Segundu Komandante PNTL, Komisariu Faustino da Costa dehan, komandu sei bolu Komandante Munisipiu, Postu Administrativu no Komandante Operasaun hotu hodi kapasita sira kona-ba oinsa mak asegura eleisaun jeral.

“Ita planeia hotu ona hodi bele fó kapasitasaun ba Komandantes hotu hosi Munisipiu no Postu Administrativu nian nune’e bele asegura eleisaun jeral ne’e ho di’ak,” dehan Faustino ba Jornalista iha Kuartel Jerál PNTL, Kaikoli, Segunda (23/01).

Atu fó formasaun ne’e, nia dehan, PNTL sei serbisu hamutuk ho Ministériu kompetente, liliu CNE no STAE.

Aleinde ne’e, nia hatete, molok ne’e PNTL halo ona kapasitasaun ba Ofisiais Polísia Suku (OPS) hosi Suku 442.