Deputadu Leonel Marcal informa, komunidade sira iha suku Fatu-kalo, Lesu Ato, Mendelu, Orana, F-hi nehan no Bubu-susu, Postu Administrativu Turiskai ne’e susar tebes atu asesu ba estrada.

Nia dehan, komunidade kestiona tanba mandatu governu atu remata ona maibé laiha mudansa ba kondisaun estrada ba sira-nia hela fatin.

“Ha’u hanoin governu tenke foti medidas atu bele responde lalais povu ki’ik sira-nia ezijensia,” dehan Leonel liu husi plenaria PN, Segunda (23/01).

Nia hatutan, kada tinan atu tama ba eleisaun governu sempre lori ekipamentu pejadu sira atu bele ba halo manutensaun no loke estrada sira ne’ebé defisil ba transporte sira atu asesu maibé, agora ne’e laiha, tanba ne’e ezije ba governu atu bele implementa nafatin planu ne’e.

Nia husu ba governu atu apoiu ekipamentu hodi taka estrada kuak sira molok tama ba eleisaun nune’e tekniku sira la’o halo supervizaun karik bele lalais no povu sira mós bele aproveita hodi utiliza estrada ne’e hodi lori sira-nia produtu ba merkadu.