Vise-Prezidente Parlamentu Nasionál, Deputada Maria Angelina Sarmento hatete, Parlamentu Nasionál sei halo alterasaun atu fundu Covid-19 ne’ebé jestor mak Ministériu Finansas, Ministériu Saúde no Ministériu Negósiu Estranjeiru Kooperasaun.

“Parlamentu Nasionál simu pedidu lei sobre levantamentu sobre estraordináriu ba fundu Petrolíferu ne’ebé realiza 2 Abríl 2020 sobre orsamentu tokon US$ 150 mais tokon $100 ba fundu Covid-19, ne’ebé diskusaun ba fundu Covid nian, Deputadu integra tiha artigu ida ministériu ne’ebé iha kompeténsia atu ezekuta osan fundu Covid,” dehan nia, iha Parlamentu Nasionál, Sesta (29/5).

Nia dehan, Governu haree katak artigu 5 lei númeru 2/2020 maka iha difikuldade atu ezekuta osan prosesu ne’e lalais, tanba artigu ne’e kesi metin Governu atu laiha fleksibilidade atu ezekuta fundu ne’e.

Governu enfrenta dezafiu atu ezekuta orsamentu ne’e, tanba ne’e Governu haree katak nesesidade atu altera artigu ne’e atu bele fó biban ba Governu hodi ezekuta fundu Covid nian, tuir prazu Estadu Emerjénsia ninian.

“Prezidente Parlamentu sei baixa ba komisaun C PN atu bele halo audiénsia ho entidade relevante sira. See la nesesáriu atu halo audiénsia depende ba desizaun komisaun nian,” dehan nia.

Nia informa, maibé komisaun presiza elabora fali relatóriu pareser hodi mai aprezenta iha plenária atu haree no hahú debate sobre alterasaun ba artigu ne’ebé espesifikamente ko’alia kona-ba ministériu relevante ne’ebé ezekuta fundu Covid.