Lei fó dalan sira bele hatama fila-fali prosesu tuir artigu 150 alínea E, Konstituisaun RDTL, maibé tenke ho 1/5 deputadu.

Jurista timoroan Pe. Júlio Crispim hatete, Arão Noe hamutuk fali ho 1/5 deputadu bele hatama fali rekerimentu ne’e.

Nia dehan, iha artigu 16-B hatete, bainhira destituisaun ne’e produs efeitu automátiku, eleisaun ba Prezidente Parlamentu foun mós efeitu automatikamente, ne’e signifika destituisaun hotu mós mandatu hotu, no ida fali eleisaun hotu ninia mandatu hahú kedas.

“Tanba lei fó dalan maski nia la hetan pose, maibé nia legál nafatin. Tanba ne’e, mak Arao Noe fó nafatin ba Aniceto atu lidera Parlamentu Nasionál ne’e mak prosesu sei la’o hela,” dehan nia, ba diáriu ne’e, iha ninia rezidénsia, Praia Kokeiros, Sesta (29/5).

Antes ne’e, pedidu husi Prezidente Parlamentu Nasionál sesante, Arao Noe de Jesus da Costa Amaral, husu ba Tribunál Rekursu (TR) atu halo apresiasaun ba pedidu fiskalizasaun konstitusionalidade tuir rejimentu parlamentu nian no ba destituisaun kargu Presidente Parlamentu Nasionál, maibé iha desizaun ne’e Tribunál Rekursu konsidera indefere tanba atu polítiku.

Desizaun husi Tribunál Rekursu ne’e liuhusi juis koletivu ho razaun katak, TR indefere tanba konsidera hanesan atu polítiku.

Tribunal indefere petisaun tanba bazeia ba artigu 355 Kodigu Prosesu Sivíl, kona-ba ‘Indeferimentu Liminar’ konsidera petisaun ne’e liminarmente indefere.

Nune’e mós tuir artigu 66 númeru 1 rejimentu Parlamentu Nasionál nian mós hatete, kualkér desizaun prezidente parlamentu nian tenke haruka ba plenáriu.

Nune’e, karta rekursu Arão Noe atu husu pedidu ba TR apresiasaun ba pedidu fiskalizasaun konstitusionalidade no tuir artigu rejimentu Parlamentár nian, tanba nia parte konsidera destituisaun ne’e inkonstitusionál ka inezisténsia kontra rejimentu PN nian.

Mezmu nune’e, iha desizaun Tribunál Rekursu nian ba rekursu kontensioza ne’ebé hatama husi rekerente Arão Noe, tribunál deside katak kualkér atu ne’ebé mosu iha Parlamentu Nasionál la'ós halo rekursu ba tribunál, maibé kabe ba desizaun meza Parlamentu Nasionál nian.

Portantu forma ida ne’ebé ho atu hasoru meza parlamentu nasionál, desizaun ne’e labele kabe ba tribunál rekursu.

Desizaun ne’e deside husi juis koletivu Deolindo dos Santos, Duarte Tilman Soares, António José Fonseca de Jesus.