Observasaun INDEPENDENTE nota katak, ambiente eskola ne’e rame tebes ho animál hodi han duut no kee rai iha jardín eskola oin.
Kondisaun eskola ne’e, dala ruma nakonu ho bibi nia teen, tanba komunidade sira sei husik animál livre.
Diretór Eskola Báziku Centru 01 Munisípiu Viqueque, Agapito Martins, rekoñese komunidade sira nia animál tama livre, tanba eskola ne’e iha moru.
Nia dehan, animál sira ne’e tama loro-loron, no sira labele oho komunidade nia animál sira ne’e, tanba ta'uk na'in.
Agapito dehan, problema ne’e dala ruma halo sira sente la di’ak, tanba iha tempu dadeer estudante sira atu tama eskola, sira tenke limpeza hodi moos bibi nia teen iha eskola oin.
“Ami nia kondisaun eskola ne’e animál tama livre, dala ruma karau, bibi, fahi tama livre, tanba la iha moru,” dehan Agapito ba INDEPENDENTE, horisehik.
Tuir nia katak, EBC 01 iha Viqueuqe sai hanesan eskola públiku ne’ebé sai sentru iha kapitál Viqueque.
Nia dehan, dala barak membru governu no ajénsia internasionál sira vizita ba eskola ne’e, haree karau, bibi no fahi la’o livre.
“Dala ruma membru governu sira mai haree karau, bibi no fahe mós iha,” tenik nia.
Ho problema ne’e, nia hateten, sira nia parte hato’o karta ba Edukasaun Viquque atu halo moru protesaun, maibé too agora seidauk hetan resposta.
Entretantu kona-ba kondisaun fíziku eskola agora komesa di’ak, maski iha eskola laran plafon balun hahú naklees.
Kona-ba kadeira no meza nia dehan, agora sufisiente ba estudante sira. Eskola ne’e rasik ho totál alunus hamutuk 1.697 no profesór permanente 3o no voluntáriu na’in 8.
