Taur ho Xanana diferente ideia nu’udar prosesu normál iha demokrasia, tanba mezmu iha palku polítika sira inimigu ba malu husi kritika, maibé iha kotuk sira amigu no unidade nafatin.
Taur rekoñese durante tempu rezisténsia iha ai-laran tinan 24, nia ho Xanana sempre mosu ideia la hanesan, maibé sira nunka tuku malu no hanoin ho unidade luta nafatin ba ukun rasik aan.
“Ami rua maun Xanana la’ós foin kritika malu. Uluk iha ai-laran mós konflitu, mas ami iha respeitu malu no iha unidade no sivizmu halo polítika”, dehan nia, iha Palasiu Prezidente, Sesta (10/03).
Nia esplika, kuandu iha tempu rezisténsia mak nia la respeita Xanana, durante tinan hitu (7) Xanana iha komarka Cipinang, Taur bele bele foti hotu nia kargu (Komandante FALINTIL). Maibé, sira kontinua rona Xanana to’o ukun aan.
Ne’e duni, Taur husu ba povu sira, lalika preokupa bainhira nia kontra hanoin Xanana, la’ós atu halo sira sai inimigu ba malu.
Nia hatutan, iha krize polítika militár 2006/2007 mós Taur ho Alkatiri no Xanana hanoin diferente too mosu konflitu, tanba ne’e povu labele preokupa.
Ezemplu konkreta, iha 2006 Xanana ho Alkatiri konflitu to’o 2012, agora sira sai amigu la’o no servisu hamutuk.
Fiar Aan Sai Primeiru Ministru
Entretantu, Taur dehan, nia la’ós lider rezisténsia, maibé hahú ninia vida nu’udar soldadu FALINTIL ne’ebé lori kartús musan iha funu hodi aprende funu no akompaña prosesu dinámika polítika rai laran to’o ukun aan.
Nia dehan, uluk iha funu, ninia aman matebian hanesan ema matan dook, siik ona Taur ninia vida neineik-neineik sei sai jenerál, no sai prezidente iha tempu ruma.
Tanba ne’e, too iha tempu ukun aan, Maun Xanana sai fó fiar ba nia hanesan jenerál. Depois, too iha tinan 2011, Taur deside abandona F-FDTL hodi kompete ba polítika to’o 2012 sai prezidente períodu 2012-2017.
Ho realidade ne’ebé akontese, depois nia aman mate husik hela mensajen katak, depois sai prezidente, Taur sei ukun tan iha kargu importante balun, maibé knaar importante ne’e ninia família seidauk fó hatete sai.
“Ha’u nia aman siik tan knaar ida, maibé ha’u nia família lakohi dehan, tanba ne’e hanoin imi (jornalista) mak hatene ida ne’ebé”, tenik Taur.
Xefe Estadu dehan, hafoin vizita povu suku 442, nia hakarak sai lider ida hodi ukun no hadi'a povu nia moris hodi kontribui ba prosesu dezenvolvimentu.
Atu hadi'a povu nia moris, nia dehan, ema hotu-hotu tenke servisu hamutuk hodi lori nasaun ne’e sai husi mukit.
