Eis Komandante FALINTIL ne’e deklara, bainhira sira luta iha ai-laran, Mari Alkatiri ba fali Mosambike, iha kontinente Áfrika ne’ebá.

“Maun Mari ko’alia ne’e loos, diferente maka ida luta ne’e halo (kontribuisaun barak) liu fali ida ho ida abut ne’e. Maun Mari halai ba tiha li'ur”, dehan Prezidente Taur bainhira soru-mutu ho jornalista sira iha Palasiu Prezidensiál, Ai-Tarak Laran, Sesta (10/3).

Taur Matan Ruak hasai lia hirak ne’e, hodi responde ba deklarasaun Sekretáriu Jerál, Mari Alkatiri katak, Taur luta ba FRETILIN mas nia abut la’ós FRETILIN.

Eis Brigadeiru Jenerál F-FDTL ne’e hatutan, hafoin Alkatiri ho lider timoroan sira halai ba rai li'ur, sira organiza malu atu luta ba Timor, to’o istória malu no tuku malu tan.

Ne’e duni, Taur konsidera Alkatiri organiza de’it ema uitoan mós labele ona, sá tan atu ukun ema barak iha nasaun TL.

Maski nune’e, Taur dehan nia gosta simu kritika husi Alkatiri, tanba kritika ne’e la’ós atu oho ninia karakter, maibé atu hadi'a buat aat sai di’ak.

“Labele konsidera nia hanesan Ó nia inimigu, maibé Ó konsidera nia hanesan Ó nia amigu,” katak nia.

Konta Vida, Hamoris Konflitu Sosiál

Lider sira iha filozofia hanoin no pensamente tolu. Primeiru, ema menus pensamentu gosta tuur gosta konta ema nia vida. Segundu, ema hanoin nivel klase gosta konta akontesimentu sira. Ikus liu, ema ne’ebé mai ho hanoin halibur, ema ne’e buka konseitu no haree ba solusaun problema.

Tanba ne’e, Taur haree ba esperiénsia durante ukun, konflitu sosiál sira ne’ebé mosu durante ne’e iha TL, tanba lider barak gosta konta ema nia vida hodi hamosu problema sosiál.

“Polítiku sira ne’e ida gosta konta ema nia vida maka barak liu, duke ida ne’ebé buka atu halibur no buka solusaun,” nia hateten.

Tanba ne’e, Taur hatutan, nia mosu mai la’ós hakarak konta no hamonu ema seluk nia hanoin, maibé buka halibur ema atu hanoin ba buat di’ak.