Komandu Jerál fó ona konfiansa tomak ba komandante Munisípiu sira atu servisu makaas hodi garante seguransa no buat hotu sei la’o ho susesu.

“Ba imi komandante Munisípiu sira, loron to’o ona hatudu katak PNTL  prontu duni atu servi nia povu rasik ho seguru”, dehan Komandu Operasaun Nasionál PNTL Superitendente Xefe Henrique da Costa bainhira halo distribuisaun Buletin de Votus ba Munispiu 13, iha STAE Nasionál Kaikoli Dili, Tersa (14/3).

Nia dehan, iha era ida ne’e ho pasadu  diferente tebes, altura ne’ebá kestaun seguransa sempre hetan apoiu husi seguransa ONU, maibé ohin loron seguransa interna PNTL rasik maka toma responsabilidade.

Komandu Munisipiu tomak tenke toma atensaun ba membru sira atua siguransa tenke la’o ho hakmatek no labele mosu provokasaun ho azitasaun propaganda hodi hamosu konflitu sosial bainhira eleisaun PR hahú.

Komandante ne’e dehan tan,  iha situaaun ida ne’e koko membru ho komadante sira nia kapasidade.

Henrique garante katak, establidade ba seguransa eleisaun sei la’o normál, la iha konflitu interna entre apoiante, kandidatura sira la insulta malu.

Iha fatun hanesan, Komandante PNTL Munisipiu Vikeke Antonio Mauluta dehan, daudaun ne’e Komandu PNTL Munisipiu Vikeke servisu makas no halo preparasaun hodi garante seguransa iha eleisaun ba PR.

Komandu rasik destaka ona membru Polisia sira hodi halo seguransa ba eleisaun PR ne’ebé  koloka membru sira tuir numeru ne’ebé iha.

Komandante ne’e mós garante katak situasaun jeral iha Vikeke diferente tebes ho pasadu, ne’ebé sei la iha konflitu interna entre apoiante sira.